عمران خان چیئرمین پی ٹی آئی رہیں گے یا نہیں، الیکشن کمیشن آج فیصلہ کرے گا

پاکستان تحریک انصاف (پی ٹی آئی) کے چیئرمین عمران خان کے پارٹی چیئرمین رہنے یا نہ رہنے کا فیصلہ الیکشن کمیشن آج کرے گا۔

الیکشن کمیشن نے چیئرمین پی ٹی آئی کو عہدے سے ہٹانے سے متعلق کیس کی سماعت آج مقرر کر رکھی ہے۔ فیصلہ آج ہوگا کہ عمران خان پارٹی چیئرمین کا عہدہ برقرار رکھیں گے یا نہیں۔ چیف الیکشن کمشنر کی سربراہی میں 5 رکنی بینچ کیس کی سماعت کرے گا جبکہ عمران خان کے وکیل کیس میں اپنا جواب جمع کرائیں گے۔

درخواست ایک شہری خالد محمود خان کی جانب سے دائر کی گئی تھی جس میں توشہ خانہ کیس میں سزا پانے کے بعد سابق وزیراعظم کو پارٹی قیادت سے ہٹانے کا مطالبہ کیا گیا تھا۔ رواں برس اگست میں الیکشن کمیشن نے عمران خان کو توشہ خانہ کیس میں سزا سنائے جانے کے بعد 5 سال کے لیے نااہل قرار دیا تھا۔

مقامی عدالت نے توشہ خانہ تحائف کی تفصیلات چھپانے پر الیکشن کمیشن کی شکایت پر سماعت کرتے ہوئے چیئرمین پی ٹی آئی کو 3 سال قید اور ایک لاکھ روپے جرمانے کی سزا سنائی تھی۔

جج ہمایوں دلاور خان کی سربراہی میں عدالت نے انہیں جان بوجھ کر قومی خزانے سے حاصل ہونے والے فوائد کو چھپا کر بدعنوانی کا مرتکب پایا تھا۔ اسی دن عمران خان کو لاہور کے زمان پارک میں ان کی رہائش گاہ سے پولیس نے گرفتار کیا تھا۔

واضح رہے کہ الیکشن کمیشن نے عمران خان کو آئین کے آرٹیکل 63 ون ایچ کے تحت 5 سال کے لیے کسی بھی سرکاری عہدے پر فائز رہنے کے لیے نااہل قرار دیا تھا۔