پاکستان کے دفتر خارجہ نے مایوسی کا اظہار کرتے ہوئے کہا کہ اقوام متحدہ کی سلامتی کونسل ایک بار پھر غزہ میں جنگ بندی کی اپیل کرنے میں ناکام رہی ہے، پاکستان فی الفور مطالبہ کرتا ہے کہ انسانی تباہی سے بچنے کے لیے فوری اور غیر مشروط جنگ بندی کا اعلان کیا جائے۔
دفتر خارجہ کی جانب سے جاری کردہ پریس ریلیز کے مطابق سیکرٹری جنرل کی طرف سے اقوام متحدہ کے چارٹر کے آرٹیکل 99 کی درخواست اور غزہ میں انسانی تباہی کے بارے میں ان کی وارننگ کے باوجود، کونسل بین الاقوامی امن و سلامتی کو برقرار رکھنے کے لیے اپنی بنیادی ذمہ داری ادا کرنے میں ناکام رہی ہے۔
’غزہ کے محصور عوام نے جس اجتماعی سزا کو برداشت کیا ہے وہ بے مثال اور ناقابل قبول ہے۔‘
مزید پڑھیں
دفتر خارجہ کے مطابق مقبوضہ فلسطین میں اسرائیل کی مہم کا تسلسل انسانی مصائب کو طول دے گا، جس میں بڑے پیمانے پر شہری ہلاکتیں ہوں گی اور لاکھوں لوگوں کو جبری بے گھر ہونا پڑے گا۔ یہ ایک وسیع اور زیادہ خطرناک تنازعہ کو بھی متحرک کر سکتا ہے۔
یہی وجہ ہے کہ ایک بھاری ذمہ داری ان تمام لوگوں پر عائد ہوتی ہے جنہوں نے غزہ کے عوام پر بلا تعطل بمباری کو طول دینے میں تعاون کیا۔ پاکستان نے انسانی تباہی سے بچنے کے لیے فوری اور غیر مشروط جنگ بندی کے مطالبے کا اعادہ کیا ہے۔
اسرائیل غزہ کے خلاف اپنے وحشیانہ حملے اور غیر انسانی محاصرے کو جلد از جلد ختم کرے، ہم اقوام متحدہ کی سلامتی کونسل پر زور دیتے ہیں کہ وہ ابھی کارروائی کرے، اس غیر انسانی جنگ کو ختم کرے اور غزہ کے لوگوں کو نسل کشی سے بچائے۔