اچھا جیون ساتھی ملنے تک شادی کرتی رہوں گی، راکھی ساونت

متنازع بیانات اور تبصروں کے باعث خبروں کی زینت بننے والی بھارتی ماڈل و اداکارہ راکھی ساونت نے کہا ہے کہ جب تک انہیں بہتر جیون ساتھی نہیں مل جاتا وہ شادی کرتی رہیں گی۔

بھارتی میڈیا رپورٹس کے مطابق راکھی ساونت نے اپنے سابق شوہر عادل درانی پر رقم چوری کرنے کا الزام عائد کرتے ہوئے کہا کہ وہ عادل درانی سے راہیں جدا کرچکی ہیں اور جلد ہی عدالت کے ذریعے طلاق بھی لے لیں گی۔ اور جیسے ہی ان کی طلاق ہوگی وہ ’ایک اچھے لڑکے کے ساتھ‘ دوبارہ شادی کریں گی، تب تک شادی کرتی رہوں گی جب تک مجھے اچھا جیون ساتھی نہیں مل جاتا۔

اداکارہ نے یہ بھی کہا کہ زندگی ایک بار ملتی ہے اور یہ ان کی زندگی ہے، وہ زندگی کو اپنے مطابق جینا چاہتی ہیں۔ بولی وڈ اداکار 10، 10 شادیاں کرلیتے ہیں، بوائے فرینڈز اور تعلقات بھی رکھتے ہیں، وہاں کوئی فرق نہیں پڑتا، تمام حدود صرف بھارت میں ہیں۔

عادل درانی سے شادی کا اعلان کرنے کے چند ہفتے بعد ہی راکھی ساونت نے ان کے خلاف مبینہ گھریلو تشدد کے الزام میں ایف آئی آر درج کرائی تھی۔ اداکارہ نے دھوکا دہی اور ریپ کا الزام بھی لگایا تھا جس کے بعد عادل درانی کئی دن پولیس کی حراست میں رہے تھے۔ یاد رہے کہ جوڑے کی علیحدگی کی کارروائی عدالت میں زیرِ سماعت ہے۔