بالی ووڈ اداکارہ راکھی ساونت نے سلمان خان کو قتل کی دھمکی ملنے کے حوالے سے میڈیا سے بات کرتے ہوئے کہا کہ ‘میں اللہ سے دعا کرتی ہوں کہ کوئی میرے سلمان بھائی کے لیے بُرا نہ سوچے’۔
راکھی ساونت نے اپنے دوستوں کے لیے افطار پارٹی کا اہتمام کیا جہاں میڈیا سے بات کرتے ہوئے اداکارہ نے سلمان خان کو جان سے مارنے کی دھمکیاں ملنے پر ردِعمل کا اظہار کیا۔
راکھی ساونت نے اداکار کی حمایت کرتے ہوئے کہا کہ سلمان خان ایک لیجنڈ ہیں اور کسی کو ان کے بارے میں بُرا نہیں سوچنا چاہیے۔
راکھی ساونت نے غصیلے انداز میں کہا کہ ‘سلمان خان ایک نیک انسان اور لیجنڈ ہیں۔ ہمیں ان کے لیے دعا کرنی چاہیے کیونکہ وہ لوگوں کے لیے بہت کام کرتے ہیں۔ میں چاہتی ہوں کہ سلمان بھائی کے دشمنوں کی آنکھیں پھوٹ جائیں اور ان کی یاداشت ختم ہوجائے۔ میں اللہ سے دعا کرتی ہوں کہ کوئی میرے سلمان بھائی کے لیے بُرا نہ سوچے’۔
واضح رہے کہ چند دن پہلے سلمان خان کو بذریعہ ای میل مارنے کی دھمکی دی گئی تھی جس میں یہ کہا گیا تھا کہ اداکار کو لارنس بشنوئی کے حالیہ انٹرویو کی ویڈیو دکھائی جائے جس میں لارنس بشنوئی نے کہا تھا کہ وہ سلمان خان کو قتل کرنا چاہتا ہے۔ پنجاب کی جیل میں قید لارنس بشنوئی کو پنجابی گلوکار سدھو موسے والا کے قتل کا مبیّنہ ماسٹر مائنڈ مانا جاتا ہے۔
اسی انٹرویو کے حوالے سے جب راکھی ساونت سے پوچھا گیا تو ان کا کہنا تھا کہ ‘جو لوگ سلمان بھائی کے خلاف انٹرویو دے رہے ہیں، میں انہیں کہنا چاہتی ہوں کہ سلمان بھائی نے تمہارا کیا بگاڑا ہے، کیوں میرے بھائی کے پیچھے ہاتھ دھو کر پڑے ہو۔ وہ بہت نیک انسان ہے پلیز ان کا پیچھا چھوڑ دو۔ سلمان بھائی لوگوں کے لیے سب کچھ کرتے ہیں اور انہوں نے میری ماں کے لیے بہت کچھ کیا ہے’۔
بھارتی اداکارہ سے متعلق جب سے یہ خبریں سامنے آئی ہیں کہ انہوں نے اسلام قبول کیا ہے اور اپنے دوست عادل خان سے شادی کی ہے، تب سے ہی وہ مسلسل خبروں میں رہنے لگی ہیں۔
