پاکستان مسلم لیگ ن کی چیف آرگنائزر مریم نواز نے کہا ہے کہ عوام 8 فروری کو شیر پر مہر لگا کر نواز شریف کو وزیراعظم بنائیں گے تاکہ قوم کی ترقی اور مہنگائی سے نجات کے پروگرام پر تیزی سے عمل درآمد ہو۔
قومی اسمبلی کے حلقہ این اے 119 میں انتخابی سرگرمیوں کے حوالے سے مشاورتی اجلاس ہوا جس کی صدارت چیف آرگنائزر ن لیگ مریم نواز نے کی۔
مزید پڑھیں
مریم نواز نے کہاکہ یہ محض انتخاب جیتنے کی نہیں عوام کو مہنگائی سے نجات دلانے کی جنگ ہے، عوام نے بہت مسائل دیکھ لیے، اب انہیں مسائل کا حل دینا ہے۔
انہوں نے کہاکہ وعدوں کی تکمیل کے لیے عوام ووٹ صرف نواز شریف کو دیں گے۔ ہم مہنگائی کا شکار کریں گے اور عوام کو ریلیف دیں گے۔
انہوں نے مزید کہاکہ بے روزگاری اور غریت سے نجات دلانے کا عملی پروگرام تیار کر لیا ہے۔
اس موقع اجلاس میں انتخابی تیاریوں کا جائزہ لیا گیا اور حلقے میں انتخابی سرگرمیوں پر تجاویز کا تبادلہ ہوا۔
مریم نواز شریف نے رہنماؤں، عہدیداروں اور کارکنوں کے جذبے اور دن رات کی محنت کو سراہا۔
اجلاس میں پارٹی کے سینیئر رہنما پرویز رشید، علی پرویز ملک، شائستہ پرویز، مریم اورنگزیب، حنا پرویز بٹ سمیت دیگر رہنما اور عہدیدار شریک ہوئے۔
