وزیراعظم شہباز شریف کی ہدایت پر خصوصی طیارہ آج شام بشکیک کے لیے روانہ ہوگا اور رات کو 130 پاکستانی طلبہ کو لے کر پاکستان پہنچے گا۔ وزیراعظم کی ہدایت پر خصوصی طیارے کے تمام تر اخراجات حکومت پاکستان ادا کرے گی۔ وزیراعظم نے ہدایت کی ہے کہ کرغزستان میں موجود تمام پاکستانی طلبہ اور ان کے خاندانوں کے ساتھ رابطے میں رہا جائے۔
مزید پڑھیں
وزیراعظم شہباز شریف نے کرغزستان میں پاکستان کے سفیر حسن علی ضیغم سے ٹیلی فونک رابطہ کرکے پاکستانی طلبہ کو واپس لانے والے خصوصی طیارے کے حوالے سے ضروری انتظامات کرنے کی ہدایت کی۔ کہا کہ زخمی پاکستانی طلبہ کو ترجیحی بنیادوں پر پاکستان لایا جائے، ایسے طلبہ جن کے ساتھ ان کے خاندان کے افراد کرغزستان میں مقیم ہیں ان کی وطن واپسی کا انتظام بھی ترجیحی بنیادوں پر کیا جائے۔
پاکستانی سفیر نے وزیراعظم کو کرغز نائب وزیر خارجہ آیواز بیک عطا خانوف سے ہوئی ملاقات کے بارے آگاہ کیا کہ کرغز حکومت نے بتایا ہے کہ حالات پر مکمل طور قابو پا لیا گیا ہے۔ کل رات اور آج تشدد کا کوئی نیا واقہ نہیں ہوا۔ سیکیورٹی بڑھا دی گئی ہے، پاکستانی اور دیگر غیر ملکی طلبہ بالکل محفوظ ہیں۔
وزیراعظم نے ہدایت کی کہ حالات معمول پر آنے کے باوجود اگر کوئی پاکستانی طالب علم وطن واپسی چاہتا ہے تو اسے ہر قسم کی سہولیات فراہم کی جائیں۔ واضح رہے کہ کچھ پاکستانی طلبہ آج 2 کمرشل پروازوں کے ذریعے بھی کرغزستان سے پاکستان پہنچیں گے۔
