امریکا کی ریاست کیلی فورنیا کے شہر لاس اینجلس کے جنگلات میں لگنے والی آگ شدت اختیار کر گئی ہے جس نے دیکھتے ہی دیکھتے کئی گھروں کو اپنی لپیٹ میں لے لیا ہے۔
یہ بھی پڑھیں: امریکا: برڈ فلو وائرس کی انسان میں منتقلی کا ایک اور کیس سامنے آگیا
وائس آف امریکا کے مطابق لاس اینجلس کے رہائشی علاقے پیسیفک پیلیسیڈ میں آگ لگی جو تیز ہوا کے سبب تیزی سے پھیلتی گئی اور اس نے تقریباً 3 ہزار ایکڑ رقبے کو اپنی لپیٹ میں لے لیا ہے۔
حکام کا کہنا ہے کہ آگ سے متاثرہ علاقے میں تقریباً 30 ہزار افراد کو نقل مکانی کے احکامات جاری کر دیے ہیں جب کہ 13 ہزار گھروں کو خطرات لاحق ہیں۔
نقل مکانی کے احکامات کے بعد بڑی تعداد میں شہریوں نے محفوظ مقامات کا رخ کر لیا ہے۔ اس دوران سڑکوں پر گاڑیوں کی قطاریں لگ گئیں جب کہ کئی لوگوں کو اپنی گاڑیاں چھوڑ کر پیدل علاقہ خالی کرنا پڑا ہے۔
حکام کے مطابق فوری طور پر آگ لگنے کی وجہ معلوم نہیں کی جاسکی۔ فی الوقت کسی جانی نقصان کی اطلاعات بھی نہیں ہیں۔
دریں اثنا کیلی فورنیا کے جنوبی علاقوں میں حالیہ خشک ہواؤں کی وجہ سے اوسط درجۂ حرارت میں بھی اضافہ ہوا ہے اور اس سیزن میں بارشیں بھی بہت کم ہوئی ہیں۔
مئی سے اب تک جنوبی کیلی فورنیا میں صفر اعشاریہ 25 سینٹی میٹر سے بھی کم بارشیں ریکارڈ کی گئی ہیں۔
کیلی فورنیا کے گورنر گیون نیوسم نے لاس اینجلس میں ہنگامی حالات کا اعلان کرتے ہوئے کہا ہے کہ انہوں نے علاقے میں کئی مکانات تباہ دیکھے ہیں۔
انہوں نے شہریوں کو خبردار کیا ہے کہ تیز ہواؤں کی وجہ سے بدھ کو بدترین صورت حال کا سامنا کرنا پڑ سکتا ہے۔
میئر آفس کے مطابق تیز ہواؤں کی وجہ سے منگل کی شام تک 28 ہزار سے زائد مکانات کو بجلی کی فراہمی منقطع ہو گئی تھی جب کہ تقریباً 5 لاکھ آبادی کو بجلی کی فراہمی منقطع ہو سکتی ہے۔
مزید پڑھیے: امریکا میں عمر بڑھنے لگی، بنیادی وجہ کیا ہے؟
صدر جو بائیڈن نے ایک بیان میں کہا ہے کہ وہ اور ان کی انتظامیہ ریاستی و مقامی حکام سے رابطے میں ہیں اور انہوں نے وفاق کی جانب سے ہرممکن مدد کی پیش کش کی ہے۔
آگ سے متاثرہ علاقے میں کئی سیلبریٹیز بھی رہائش پذیر ہیں جو تیزی سے پھیلنے والی آگ کی ویڈیوز بنا کر سوشل میڈیا پر اپ لوڈ کر رہی ہیں۔
اداکار جیمز ووڈ کی جانب سے پوسٹ کردہ ایک ویڈیو میں جھاڑیوں اور ان کے گھر کے قریب پہاڑی پر ناریل کے درختوں میں سلگتی آگ دیکھی جا سکتی ہے۔
ووڈ نے ایک مختصر ویڈیو میں کہا کہ وہ نقل مکانی کی تیاری کر رہے ہیں۔
مزید پڑھیں: چین نے امریکا کی 28 کمپینوں کی برآمد پر پابندی عائد کردی
اسی طرح پیسیفک پیلیسیڈ میں رہائش پذیر اداکار اسٹیو گٹنبرگ نے شہریوں پر زور دیا ہے کہ جو لوگ اپنی گاڑیاں نہیں لے جا سکتے وہ گاڑیوں کی چابیاں وہیں چھوڑ جائیں تا کہ انہیں ہٹا کر آگ بجھانے کے لیے آنے والی گاڑیوں کا راستہ بنایا جا سکے۔
