پاکسان مسلم لیگ ن کے چیف وہپ طارق فضل چوہدری نے کہا ہے کہ 190 ملین پاؤنڈ کیس کا فیصلہ غیرمبہم ہے، بانی پی ٹی آئی عمران خان کو اختیارات کے ناجائز استعمال اور کرپشن پر سزا ہوئی ہے۔
اسلام آباد میں نیوز کانفرنس کرتے ہوئے طارق فضل چوہدری نے کہا کہ پہلے بھی کہا تھا کہ عدالتی معاملات مذاکرات سے منسلک نہیں اور نہ ہی بانی پی ٹی آئی کی رہائی کا مذاکرات سے کوئی تعلق ہے، 190 ملین پاؤنڈ کیس اختیارات کے ناجائز استعمال کا کیس ہے۔
یہ بھی پڑھیں: 190 ملین پاؤنڈ ریفرنس کا تحریری فیصلہ جاری، اہم نکات اور پس منظر
انہوں نے کہا کہ چوری اور کرپشن کا پیسہ ثابت ہونے پر متعلقہ ملک کو واپس کرنا برطانیہ کا قانون ہے، پی ٹی آئی دور میں انتہائی خفیہ طریقے سے کابینہ نے ڈیل کی منظوری دی، کابینہ کی منظوری سے برطانیہ سے ملنے والی رقم سپریم کورٹ میں جرمانے کی مد میں جمع کرائی گئی۔
طارق فضل چوہدری کا کہنا تھا کہ عدالت نے کرپشن کیس پر بہت واضح فیصلہ دیا ہے۔
