سابق وزیراعظم و بانی پی ٹی آئی عمران خان نے فیلڈ مارشل سید عاصم منیر سے متعلق ایک بار پھر متنازع گفتگو کرتے ہوئے کہا ہے کہ جس ملک میں جنگل کا قانون ہو اس ملک میں فیلڈ مارشل نہیں جنگل کا بادشاہ ہونا چاہیے۔
عمران خان کی ہمشیرہ علیمہ خان نے اڈیالہ میں بھائی سے ملاقات کے بعد میڈیا سے گفتگو کرتے ہوئے کہاکہ بانی ٹی آئی نے ایک بار پھر اپنے مؤقف کو دہرایا ہے کہ جس ملک میں جنگل کا قانون ہو وہاں فیلڈ مارشل نہیں جنگل کا بادشاہ ہونا چاہیے۔
عمران خان نے آج پھر اپنے موقف کو دہرایا ہے کہ جس ملک میں جنگل کا قانون ہو اس ملک میں فیلڈ مارشل نہیں جنگل کا بادشاہ ہونا چاہیے ۔
علیمہ خان
pic.twitter.com/o1FjFV4p39— PTI (@PTIofficial) May 31, 2025
یہ بھی پڑھیں آرمی چیف کو فیلڈ مارشل کا عہدہ ملنے پر عمران خان نے کیا کہا؟ علیمہ خان نے بتادیا
واضح رہے کہ اس سے قبل آرمی چیف سید عاصم منیر کے فیلڈ مارشل بننے پر بھی عمران خان نے اڈیالہ جیل میں ایسی ہی گفتگو کی تھی، جس کے بعد عوام کی جانب سے انہیں تنقید کا نشانہ بنایا گیا۔
دوسری جانب بانی پی ٹی آئی عمران خان کا کہنا ہے کہ ہمیں مسلسل دیوار سے لگایا جارہا ہے، جس کے خلاف ملک گیر احتجاجی تحریک کا اعلان کرتا ہوں۔ انہوں نے اس حوالے سے سینیئر پی ٹی آئی رہنما بیرسٹر علی ظفر کو پلان بنا کر پیش کرنے کی ہدایت کی ہے۔
اڈیالہ جیل میں عمران خان سے ملاقات کے بعد میڈیا سے گفتگو کرتے ہوئے بیرسٹر علی ظفر نے کہاکہ ہماری تحریک ملک گیر ہوگی، اس کا مرکز اسلام آباد نہیں ہوگا۔
انہوں نے کہاکہ عمران خان نے واضح کیا ہے کہ سڑکوں پر آنے کے سوا ہمارے پاس کوئی چارہ نہیں، کیوں کہ ہمیں دیوار سے لگایا گیا ہے، میں جیل میں بیٹھ کر ملک بھر میں ہونے والے احتجاج کو لیڈ کروں گا۔
یہ بھی پڑھیں ایک طرف 9 مئی کے ملزموں کو سزائیں، دوسری جانب مذاکرات، عمران خان اور پی ٹی آئی کا مستقبل کیا ہوگا؟
واضح رہے کہ اس سے قبل 24 نومبر 2024 کو پی ٹی آئی نے اسلام آباد کی جانب مارچ کیا تھا، اور پھر 26 نومبر کو انتظامیہ نے ایک آپریشن کے ذریعے احتجاجی مظاہرین کو منتشر کردیا تھا، جس کے بعد پی ٹی آئی نے الزام عائد کیا کہ ان کے متعدد کارکنوں کو قتل کردیا گیا ہے، تاہم حکومت اس سے انکار کرتی ہے۔
