پشاور تعلیمی بورڈ نے میٹرک سالانہ امتحانات 2025 کے نتائج کا اعلان کر دیا ہے۔
نتائج کے مطابق اس سال میٹرک کے امتحانات میں مجموعی طور پر 91 ہزار 589 طلبا و طالبات نے شرکت کی، جن میں سے 76 ہزار 484 کامیاب قرار پائے۔ اس طرح کامیابی کا تناسب 83.5 فیصد رہا۔
پشاور بورڈ کے نتائج کے مطابق 14 ہزار 530 طلبا و طالبات امتحان میں ناکام رہے۔
دوسری جانب نویں جماعت کے امتحانات میں ایک لاکھ 1 ہزار 888 طلبا و طالبات شریک ہوئے جن میں سے 61 ہزار 753 نے کامیابی حاصل کی۔ نویں جماعت کا کامیابی تناسب غیر معمولی طور پر 98.8 فیصد رہا۔
نتائج کے اعلان میں یہ بھی واضح کیا گیا ہے کہ نویں جماعت کے 38 ہزار 907 طلبا و طالبات مختلف پرچہ جات میں فیل ہوئے لیکن انہیں دسویں جماعت میں پروموٹ کردیا گیا ہے۔
نتائج کے مطابق میٹرک امتحانات میں پہلی تینوں پوزیشنز پر نجی اسکولز کی طالبات نے قبضہ جمایا۔ فاطمہ جگنو نے 1180 نمبر لے کر پہلی پوزیشن، سارہ عمران نے 1178 نمبر کے ساتھ دوسری جبکہ شمائلہ اور عائنہ شعیب نے 1176 نمبر لے کر مشترکہ طور پر تیسری پوزیشن حاصل کی۔
