بنگلہ دیش کی جماعتِ اسلامی کے 5 رکنی وفد نے ہفتے کے روز پاکستان کے نائب وزیرِاعظم و وزیرِ خارجہ اسحاق ڈار سے ڈھاکا میں پاکستانی ہائی کمیشن میں ملاقات کی۔
یہ بھی پڑھیں:بنگلہ دیش کے ساتھ مستقبل میں ایسے تعلقات چاہتے ہیں جو ہمیں متحد کریں، وزیر خارجہ اسحاق ڈار
ترجمان جماعت اسلامی کے مطابق ملاقات خوشگوار اور مخلصانہ ماحول میں ہوئی، جس میں بنگلہ دیش کی موجودہ صورتحال اور دونوں ممالک کے درمیان مستقبل میں تعاون کے امکانات پر تفصیلی بات چیت کی گئی۔
پاکستانی وزیرِ خارجہ کے ہمراہ ہائی کمشنر عمران حیدر اور ہائی کمیشن کے دیگر اعلیٰ حکام بھی موجود تھے۔
جماعت اسلامی کے وفد میں نائب امیر ڈاکٹر سید عبداللہ محمد طاہر، سیکریٹری جنرل پروفیسر میا غلام پروار، اسسٹنٹ سیکریٹری جنرل مولانا اے ٹی ایم مسعود، ایڈووکیٹ احسان الحق محبوب زبیر اور مرکزی مجلسِ عاملہ کے رکن و سیکریٹری شعبہ نشر و اشاعت ایڈووکیٹ مطیع الرحمان اکند شامل تھے۔
فریقین نے اس عزم کا اظہار کیا کہ پاکستان اور بنگلہ دیش باہمی ترقی اور خوشحالی کے لیے مل کر کام کریں گے۔
یہ بھی پڑھیں:اسحاق ڈار تاریخی دورے پر بنگلہ دیش پہنچ گئے، اہم ملاقاتیں شیڈول
جماعت اسلامی کے ذرائع کے مطابق اسحاق ڈار اتوار کی دوپہر ڈھاکا میں جماعتِ اسلامی کے امیر ڈاکٹر شفیق الرحمان سے ان کی رہائش گاہ بشندھرا میں ملاقات کریں گے۔
پاکستانی نائب وزیراعظم ہفتہ کی دوپہر دو روزہ دورے پر ڈھاکا پہنچے جہاں بنگلہ دیش کے فارن سیکریٹری اسد عالم سیام نے ہوائی اڈے پر ان کا استقبال کیا۔
