چین کے مشہور باڈی بلڈر اور قومی چیمپئن وانگ کن 30 برس کی عمر میں انتقال کر گئے۔ صوبائی باڈی بلڈنگ ایسوسی ایشن کے مطابق ان کی موت کی وجہ بظاہر دل سے متعلق عارضہ بنی۔
وانگ کن انٹرنیشنل فیڈریشن آف باڈی بلڈنگ اینڈ فٹنس پروفیشنل لیگ کے پیشہ ور ایتھلیٹ تھے۔ انہیں چین کے بہترین باڈی بلڈرز میں شمار کیا جاتا تھا۔ انہوں نے چینی باڈی بلڈنگ ایسوسی ایشن (CBBA) کی نیشنل باڈی بلڈنگ چیمپئن شپ میں مسلسل 8 بار ٹائٹل جیت کر ریکارڈ قائم کیا۔
وہ اپنی غیر معمولی سخت ٹریننگ اور سخت غذا کے باعث مشہور تھے۔ ان کی خوراک میں سویا ساس میں ڈوبا ہوا گوشت، ہاٹ پاٹ کا شوربہ اور ابلی ہوئی چکن بریسٹ شامل تھی۔
یہ بھی پڑھیے امریکی باڈی بلڈر ہیلی میک نیف 37 سال کی عمر میں چل بسیں
انٹرویوز میں وانگ کن کا کہنا تھا کہ انہوں نے اپنی جسمانی ساخت حاصل کرنے کے لیے 10 برس تک راہبوں جیسی زندگی گزاری۔ وہ اکثر چینی نئے سال کے موقع پر بھی جشن منانے کے بجائے ٹریننگ جاری رکھتے تھے۔
وانگ کن ایک کامیاب کاروباری شخصیت بھی تھے۔ وہ اپنے آبائی شہر میں ’مسِل فیکٹری‘ کے نام سے ایک مقبول جم چلاتے تھے اور ہیفئی شہر میں نیا جم کھولنے کی تیاری کر رہے تھے، جسے انہوں نے ’ایک نئی شروعات، ایک نئی دنیا‘ قرار دیا تھا۔
معروف باڈی بلڈرز کا کم عمری میں انتقال
واضح رہے کہ دنیا بھر میں کئی معروف باڈی بلڈرز کم عمری میں انتقال کر چکے ہیں۔ آسٹریلوی انٹرنیٹ اسٹار زیز (عزیز شاورشیان) 22 سال کی عمر میں اسٹیرائیڈز سے جڑے دل کے دورے سے چل بسے۔ جرمن فٹنس انفلوئنسر جو لنڈنر (جو اسٹیتھکس) 30 سال کی عمر میں اینیورزم کے باعث انتقال کر گئے۔
یہ بھی پڑھیے خواتین جم کرتے کیا غلطیاں کرتی ہیں؟ تمنا بھاٹیا کے کوچ نے بتا دیا
اسی طرح آسٹریا کے پیشہ ور باڈی بلڈر اینڈریاس منزر 31 برس کی عمر میں انتہائی باڈی بلڈنگ طریقوں کے باعث اعضا کی خرابی سے وفات پا گئے، جبکہ امریکی باڈی بلڈر رچ پیانا 46 سال کی عمر میں کومے میں جانے کے بعد چل بسے۔ بھارتی باڈی بلڈر وریندر گھومن 42 سال کی عمر میں دل کا دورہ پڑنے سے انتقال کر گئے۔
