بھارتی شہر ممبئی کے علاقے شیواجی نگر میں 19 سالہ لڑکی کو دن دیہاڑے قریب سے گولی مار کر قتل کر دیا گیا۔ پولیس کے مطابق واقعہ مبینہ طور پر محبت کے تنازع (لو ٹرائنگل) کا نتیجہ ہے۔
مزید پڑھیں: محبوب نے شادی کے اصرار پر خاتون کو قتل کر کے دفنا دیا
مقتولہ کی شناخت شفا شیخ کے نام سے ہوئی ہے، جسے فرقانیہ مسجد کے علاقے میں نشانہ بنایا گیا۔ پولیس حکام کا کہنا ہے کہ شفا کو منگل کی دوپہر ایک مقامی خاتون نے ملاقات کے بہانے بلایا تھا۔ ملاقات کے دوران دونوں کے درمیان کسی معاملے پر تلخ کلامی ہوئی، جس کے بعد ملزمہ نے مبینہ طور پر فائرنگ کر دی۔
پولیس کے مطابق گولی انتہائی قریب سے شفا کے چہرے پر ماری گئی، جو گال سے داخل ہو کر کھوپڑی میں جا لگی اور جان لیوا ثابت ہوئی۔ مقامی افراد زخمی لڑکی کو فوری طور پر راجواڑی اسپتال گھاٹ کوپر منتقل کر گئے، تاہم وہ زخموں کی تاب نہ لاتے ہوئے راستے میں ہی دم توڑ گئی، بعد ازاں ڈاکٹروں نے اس کی موت کی تصدیق کر دی۔
مزید پڑھیں: ’ہنی مون مرڈر‘ نئی دلہن نے شوہر کو اپنے سابق بوائے فرینڈ کی مدد سے قتل کردیا
ممبئی پولیس نے واقعے کے 12 گھنٹوں کے اندر کارروائی کرتے ہوئے مرکزی ملزمہ، جس کی عمر 25 سال بتائی جا رہی ہے، اور ایک 23 سالہ مرد کو گرفتار کر لیا ہے۔ پولیس کے مطابق شواہد اور ابتدائی تفتیش کی بنیاد پر دونوں کو حراست میں لیا گیا اور مزید تحقیقات جاری ہیں۔
حکام کا کہنا ہے کہ واقعے کی تمام پہلوؤں سے تفتیش کی جا رہی ہے اور جلد مزید تفصیلات سامنے لائی جائیں گی۔
