بھارتی پولیس نے 2 بنگلہ دیشی شہریوں کو گرفتار کر لیا ہے جن پر ڈھاکہ میں ایک مقبول طالب علم رہنما کے قتل کا الزام ہے۔
پولیس کے مطابق یہ دونوں ملزمان مبینہ طور پر غیرقانونی طور پر بھارت میں داخل ہوئے تھے۔
یہ بھی پڑھیں: عثمان ہادی قتل کیس: ملزمان کو فرار میں مدد پر 2بھارتی شہری گرفتار
بھارت کے سخت ناقد سمجھے جانیوالے بنگلہ دیشی طلبہ رہنما شریف عثمان ہادی 2024 میں ہونے والی اس عوامی تحریک میں سرگرم تھے جس کے نتیجے میں اس وقت کی وزیر اعظم شیخ حسینہ کو اقتدار چھوڑنا پڑا۔
عثمان گزشتہ سال نقاب پوش حملہ آوروں کی فائرنگ سے زخمی ہو گئے تھے، بعد ازاں انہیں علاج کے لیے سنگاپور منتقل کیا گیا جہاں وہ زخموں کی تاب نہ لاتے ہوئے دم توڑ گئے۔
https://Twitter.com/iindrojit/status/2030630632066351455
بنگلہ دیشی پولیس کا دعویٰ تھا کہ قاتل واردات کے بعد بھارت فرار ہو گیا تھا، تاہم اس وقت بھارتی حکام نے اس الزام کو مسترد کر دیا تھا۔
اب بھارت کی سرحدی ریاست مغربی بنگال کی پولیس نے کہا ہے کہ ان کی تحویل میں موجود 2 بنگلہ دیشی شہریوں سے ابتدائی تفتیش میں اشارہ ملا ہے کہ وہ عثمان شریف ہادی کے قتل میں ملوث تھے۔
مزید پڑھیں: عثمان ہادی کے قتل میں ملوث کسی فرد کو نہیں بخشا جائے گا، بنگلہ دیش
پولیس کے بیان کے مطابق انہیں خفیہ اور قابلِ اعتماد معلومات ملی تھیں کہ دونوں ملزمان بنگلہ دیش سے فرار ہو کر غیرقانونی طور پر بھارت میں داخل ہوئے اور سرحدی علاقے میں پناہ لینے کی کوشش کر رہے تھے تاکہ دوبارہ بنگلہ دیش واپس جا سکیں۔
عثمان شریف ہادی کی موت کے بعد بنگلہ دیش میں شدید احتجاج شروع ہو گیا تھا۔ مشتعل ہجوم نے کئی عمارتوں کو نذرِ آتش کر دیا جن میں بھارت نواز سمجھے جانے والے 2 بڑے اخبارات اور ایک اہم ثقافتی ادارہ بھی شامل تھا۔
اس قتل کے واقعے نے بنگلہ دیش اور بھارت کے درمیان تعلقات کو مزید کشیدہ کر دیا، جو پہلے ہی اس وقت سے تناؤ کا شکار ہیں جب شیخ حسینہ عوامی جمہوری تحریک کے بعد ملک چھوڑ کر بھارت میں پناہ لینے پر مجبور ہوئیں۔
