مسجد نبوی میں پاکستانی عازمین حج کے لیے ریاض الجنہ کی زیارت کا باقاعدہ آغاز کر دیا گیا ہے، جس کے تحت زائرین کو منظم طریقے سے اس مقدس مقام تک رسائی فراہم کی جا رہی ہے۔
انتظامات کا جائزہ ایک اہم اجلاس میں لیا گیا جس کی صدارت کوآرڈینیٹر مدینہ کاشف حسین، ڈائریکٹر مدینہ زاہد سہیل اور ریاض الجنہ ٹیم کے انچارج زبیر نیازی نے کی۔
یہ بھی پڑھیں: پاکستان سے حج پروازوں کا سلسلہ جاری، 2 ہزار 687 عازمین مدینہ منورہ پہنچ گئے
اجلاس میں زائرین کی سہولت اور ہجوم کو مؤثر انداز میں منظم کرنے کے اقدامات پر غور کیا گیا۔
حکام کے مطابق آج مجموعی طور پر 335 پاکستانی عازمین حج ریاض الجنہ میں حاضری دیں گے، جن میں 173 مرد اور 162 خواتین شامل ہیں۔
ان حاضریوں کے لیے سعودی حکام سے خصوصی اجازت بھی حاصل کی گئی ہے اور زائرین کے رش کو قابو میں رکھنے کے لیے مخصوص اوقات مقرر کیے گئے ہیں۔
مرد عازمین کو دوپہر سے نماز عشاء تک اور پھر دوپہر 2 بجے سے نماز فجر تک حاضری کی اجازت دی گئی ہے۔
مزید پڑھیں: پاکستان علما کونسل اور دارالافتا پاکستان کی جانب سے حجاج و عمرہ زائرین کے لیے ضابطہ اخلاق جاری
اسی طرح خواتین کے لیے نماز فجر کے بعد صبح 11 بجے تک اور نماز عشاء کے بعد رات 12 بجے تک کے اوقات مختص کیے گئے ہیں۔
تمام نقل و حرکت کی نگرانی وزارتِ مذہبی امور کے عملے اور خدام الحجاج کے ذریعے کی جا رہی ہے تاکہ عازمین کو ایک منظم، محفوظ اور آسان تجربہ فراہم کیا جا سکے۔
حکام کا کہنا ہے کہ مسجد نبوی کے اندر واقع اس نہایت مقدس مقام تک رسائی کو یقینی بنانا مدینہ میں موجود پاکستانی زائرین کے لیے اولین ترجیح ہے۔
