امریکی وزیر خارجہ مارکو روبیو جمعرات کو ویٹیکن میں پوپ پوپ لیو سے اہم ملاقات کریں گے جس میں دوٹوک اور کھلے انداز میں تبادلہ خیال متوقع ہے۔
یہ بھی پڑھیں: جنگیں اور وسائل کی لوٹ مار انسانیت کے مستقبل کی چوری ہیں، پوپ لیو
ہولی سی میں تعینات امریکی سفیر برائن برچ کے مطابق ملاقات میں موجودہ امریکی انتظامیہ کی پالیسیوں پر واضح اور بے لاگ گفتگو ہوگی جس سے ممالک کے درمیان اختلافات کے باوجود براہ راست رابطے کی اہمیت اجاگر ہوتی ہے۔
میڈیا سے گفتگو کرتے ہوئے انہوں نے کہا کہ ممالک کے درمیان اختلافات بین الاقوامی تعلقات کا فطری حصہ ہیں تاہم انہیں تعمیری مکالمے کے ذریعے حل کیا جانا چاہیے۔
ان کے مطابق باہمی احترام اور خلوص پر مبنی سفارتکاری ہی اختلافات کے حل کی کنجی ہے۔
برچ نے کہا کہ قومیں ہمیشہ ایک رائے پر متفق نہیں ہوتیں لیکن ان اختلافات سے نمٹنے کا مؤثر طریقہ برادری اور حقیقی مکالمہ ہے۔
انہوں نے مزید کہا کہ روبیو کا دورہ اسی جذبے کی عکاسی کرتا ہے جہاں وہ کھلے دل کے ساتھ بات چیت اور رابطے کے لیے آ رہے ہیں۔
توقع ہے کہ ملاقات میں ٹرمپ انتظامیہ سے جڑے مختلف پالیسی امور زیر بحث آئیں گے تاہم ایجنڈے کی تفصیلات عوامی سطح پر جاری نہیں کی گئیں۔
مزید پڑھیے: ’دنیا چند ظالموں کے ہاتھوں تباہ ہو رہی ہے‘ ، پوپ لیو کا لہجہ سخت ہونے لگا
مبصرین کے مطابق امریکی اعلیٰ حکام اور ویٹیکن کے درمیان ملاقاتیں عموماً سیاسی اور اخلاقی دونوں پہلو رکھتی ہیں جن میں خصوصاً عالمی امن، ہجرت اور انسانی مسائل جیسے موضوعات شامل ہیں۔
برچ نے اس بات کا اعادہ کیا کہ ملاقات کا مقصد صرف مؤقف پیش کرنا نہیں بلکہ بامعنی مکالمے کو فروغ دینا ہے۔ وزیر خارجہ یہاں اسی نیت سے آ رہے ہیں کہ سنیں، بات کریں اور امریکی پالیسی پر کھل کر گفتگو کریں۔
ویٹیکن عالمی سطح پر ایک اہم سفارتی اور اخلاقی حیثیت رکھتا ہے اور حساس بین الاقوامی مسائل پر مکالمے میں تاریخی کردار ادا کرتا رہا ہے۔ اس تناظر میں روبیو اور پوپ لیو کی ملاقات کو اختلافات کے باوجود روابط مضبوط بنانے اور مشترکہ نکات تلاش کرنے کی کوشش کے طور پر دیکھا جا رہا ہے۔
مزید پڑھیں: پوپ لیو چہاردہم کا ایران حملوں پر پہلا ردعمل، ہتھیاروں کے بجائے مکالمے پر زور
یہ دورہ امریکی صدر ڈونلڈ ٹرمپ اور پوپ لیو کے درمیان حالیہ سخت بیانات کے تبادلے کے چند ہفتوں بعد ہو رہا ہے جس میں ہجرت اور انسانی پالیسی جیسے امور پر اختلافات سامنے آئے تھے۔ مبصرین کے مطابق یہ ملاقات کشیدگی کم کرنے اور تعمیری مکالمہ بحال کرنے کی کوشش ہے۔
