کیتھولک چرچ کے سربراہ پوپ لیو چہارم آرٹیفیشل انٹیلیجنس (اے آئی) کے ابھار اور انسانیت پر اس کے اثرات کے حوالے سے اپنا پہلا تفصیلی اور تاریخی مکتوب جاری کرنے جارہے ہیں۔
ویٹیکن کی جانب سے پیر کو جاری بیان کے مطابق ‘میگنیفیکا ہیومانیتاس’ (شاندار انسانیت) کے نام سے یہ دستاویز 25 مئی کو خود پوپ لیو چہارم پبلک کے سامنے پیش کریں گے، اس اہم دستاویز میں جنگوں میں اے آئی کے استعمال کی مذمت اور مزدوروں کے حقوق پر اس ٹیکنالوجی کے منفی اثرات کو موضوع بنایا جائے گا۔
یہ بھی پڑھیں: کیا آپ بینک کے کسٹمر سروس نمائندے سے تنگ ہیں؟ پوپ لیو بھی اس صورتحال سے نہ بچ سکے
پوپ کی جانب سے اپنے تحریری مکتوبات کو خود عوامی تقریب میں پیش کرنا ویٹیکن کی روایات کے برعکس ہے، کیونکہ عام طور پر یہ ذمہ داری کارڈینلز اور پریس حکام نبھاتے ہیں۔ اس منفرد تقریب میں پوپ کے ساتھ آرٹیفیشل انٹیلیجنس کمپنی ‘اینتھروپک’ کے شریک بانی کرس اولاہ بھی شرکت کریں گے۔
پاپائے روم کی تاریخ میں ‘انسائیکلیکل’ کو چرچ کے 1.4 ارب ارکان کے لیے سب سے اعلیٰ درجے کی سماجی اور اخلاقی تعلیمات مانا جاتا ہے جو کہ پوپ کی ترجیحات کو ظاہر کرتی ہیں۔
پہلے امریکی پوپ لیو چہارم نے اس تاریخی دستاویز پر 15 مئی کو دستخط کیے تھے، جو کہ پوپ لیو سیزدہم کے مزدوروں کے حقوق کے لیے جاری کردہ مشہور مکتوب کی 135 ویں برسی کا دن تھا۔ موجودہ پوپ اپنے ایک سالہ دورِ اقتدار میں کئی بار اے آئی کے خطرات پر بات کر چکے ہیں۔
یہ بھی پڑھیں: پوپ لیو کے سفید اسنیکرز نے انٹرنیٹ پر دھوم مچا دی، سوشل میڈیا پر میمز کا سیلاب
انہوں نے گزشتہ ہفتے ہی یورپ کی ایک بڑی یونیورسٹی میں خطاب کے دوران یوکرین، غزہ، لبنان اور ایران کی جنگوں کا حوالہ دیتے ہوئے نئی ٹیکنالوجی اور جنگ کے ہولناک گٹھ جوڑ کی مذمت کی تھی۔
اس تقریب میں اینتھروپک کے شریک بانی کرس اولاہ کی دعوت کو اے آئی نیٹ ورکس کی سیکیورٹی کے حوالے سے اہم دیکھا جا رہا ہے۔ اینتھروپک کمپنی کا امریکی صدر ڈونلڈ ٹرمپ کی انتظامیہ کے ساتھ اس بات پر تنازع رہا ہے کہ کمپنی اپنے ماڈلز کو خودمختار ہتھیاروں یا بڑے پیمانے پر نگرانی جیسے فوجی مقاصد کے لیے استعمال کرنے پر سخت پابندیاں عائد کرتی ہے۔
یاد رہے کہ کیتھولک چرچ کی تاریخ میں یہ پہلا موقع ہے کہ کوئی پوپ ٹیکنالوجی کے خطرات اور بالخصوص آرٹیفیشل انٹیلیجنس پر اس قدر گہری تشویش کا اظہار کررہا ہے۔
