مدینہ انتظامیہ نے یومِ عرفہ اور نمازِ عید کے لیے شٹل سروس شروع کرنے کا اعلان کیا ہے۔
سعودی پریس ایجنسی کے مطابق مدینہ بس انتظامیہ نے یومِ عرفہ اور عید الاضحیٰ کی نماز کے بابرکت مواقع پر مسجدِ نبوی اور مسجدِ قبا کے لیے خصوصی شٹل بس سروس فعال کرنے کا اعلان کیا ہے۔
یہ بھی پڑھیں: راستے میں پھنس جانے والے عازمین حج کی مدد کے لیے عمدہ سروس کا آغاز
اس اقدام کا مقصد زائرین اور نمازیوں کی آمد و رفت کو آسان بنانا اور عام پبلک ٹرانسپورٹ کے شیڈول کو متاثر کیے بغیر ٹریفک کے بہاؤ کو بہتر بنانا ہے۔
یہ خصوصی سروس یومِ عرفہ کے دن دوپہر 12:00 بجے سے لے کر عشا کی نماز کے ایک گھنٹے بعد تک مختلف مقررہ راستوں اور اسٹیشنوں کے ذریعے چلائی جائے گی۔
ان راستوں میں سید الشہدا اسٹیشن، السلام کالج اسٹیشن، اور شذا ڈسٹرکٹ سے مسجدِ نبوی کے روٹس شامل ہیں۔ اس کے علاوہ گارڈن اسٹیشن سے مسجدِ نبوی اور العالیہ اسٹیشن سے مسجدِ قبا کے لیے بھی بسیں چلائی جائیں گی۔
یہ بھی پڑھیں: مکہ مکرمہ: مسجد الحرام میں ہارٹ اٹیک کے علاج کے لیے خصوصی زون قائم
عید الاضحیٰ کے پہلے دن مسجدِ نبوی اور مسجدِ قبا جانے والے نمازیوں کی سہولت کے لیے کئی اہم روٹس صبح 8:00 بجے تک مسلسل کام کرتے رہیں گے۔
ان روٹس میں خصوصاً سید الشہدا، السلام کالج اور العالیہ اسٹیشن کے راستے شامل ہیں تاکہ عید کی نماز کے لیے آنے والے لوگوں کو کسی بھی قسم کی پریشانی کا سامنا نہ کرنا پڑے۔
