وزیرداخلہ بلوچستان میر ضیا اللہ لانگو نے نوجوان عبدالرزاق ترکئی کے گھر جا کر ان کی عیادت کی اور ان کی خیریت دریافت کی۔ اس موقع پر انہوں نے کہا کہ عبدالرزاق ترکئی وہ نوجوان ہیں جنہوں نے جرات، غیرت اور انسانیت کی اعلیٰ مثال قائم کی ہے۔
یہ بھی پڑھیں:جان بھی چلی جاتی تو افسوس نہ ہوتا، لیڈی ڈاکٹر ماہ نور کو بچانے والے عبدالرزاق کی داستان
وزیرداخلہ میر ضیا اللہ لانگو نے کہا کہ ڈاکٹر ماہ نور ناصر کی جان بچانے والا نوجوان عبدالرزاق قوم کا حقیقی ہیرو ہے۔ ان کے مطابق وہ نوجوان جنہوں نے اپنی ماں اور بہن کی زندگی بچانے کے لیے اپنی جان خطرے میں ڈالی، وہ ملک و قوم کا فخر ہیں۔
انہوں نے کہا کہ ایسے افراد جو خود کو بچانے کے لیے خواتین کو ڈھال کے طور پر استعمال کریں، وہ کسی صورت ہیرو کہلانے کے مستحق نہیں ہو سکتے۔ اصل بہادری وہ ہے جو اپنے اہل خانہ اور خواتین کے تحفظ کے لیے ہر قربانی دینے کے جذبے سے ظاہر ہو۔
میر ضیاء اللہ لانگو نے مزید کہا کہ عبدالرزاق نے اپنی ماں اور بہنوں کی عزت و جان کے تحفظ کے لیے اپنی جان خطرے میں ڈال کر قابلِ تقلید مثال قائم کی ہے۔
یہ بھی پڑھیں:کیا تیزاب گردی کا شکار ڈاکٹر ماہ نور ناصر کے لیے ملزم نے رشتہ بھیجا تھا؟ والد نے حقیقت بتادی
انہوں نے کہا کہ اصل بہادر نوجوان وہ ہیں جو اپنے خاندان اور خواتین کے تحفظ کے لیے ہر ممکن قربانی دینے کو تیار رہتے ہیں، اور ایسے کردار ہی معاشرے کے لیے امید اور فخر کا باعث بنتے ہیں۔
