پاکستان کے سابق سینیئر سفارتکار ایمبیسیڈر جوہر سلیم نے کہا ہے کہ بھارت کی جانب سے سندھ طاس معاہدے کو معطل قرار دینا بین الاقوامی قانون کی خلاف ورزی ہے کیونکہ اس معاہدے میں اسے معطل کرنے کی کوئی شق موجود نہیں۔ انہوں نے کہا کہ بھارت پاکستان کو اس معاملے پر دبا نہیں سکتا اور اسے بالآخر سندھ طاس معاہدے پر عمل درآمد کرنا ہی ہوگا۔
یہ بھی پڑھیں: سندھ طاس معاہدہ یکطرفہ معطل یا ختم نہیں کیا جا سکتا، حنا ربانی کھر
وی نیوز سے خصوصی گفتگو کرتے ہوئے ایمبیسیڈر جوہر سلیم نے کہا کہ سنہ 1960 میں پاکستان اور بھارت کے درمیان ہونے والا سندھ طاس معاہدہ ایک بین الاقوامی قانونی معاہدہ ہے جس پر اس وقت کے پاکستانی صدر اور بھارتی وزیراعظم نے دستخط کیے تھے اور یہ دونوں ممالک کے درمیان پانی کی تقسیم کا ایک مستقل اور تسلیم شدہ نظام فراہم کرتا ہے۔
انہوں نے کہا کہ بھارت کا یہ مؤقف کہ اس نے سندھ طاس معاہدے کو معطل کر دیا ہے سراسر غیر قانونی ہے کیونکہ معاہدے کے متن میں ایسی کوئی شق موجود نہیں جو کسی فریق کو اسے یکطرفہ طور پر معطل کرنے کی اجازت دیتی ہو۔ ان کا کہنا تھا کہ سندھ طاس معاہدہ مکمل طور پر برقرار ہے اور اس کی قانونی حیثیت آج بھی برقرار ہے۔
ایمبیسیڈر جوہر سلیم نے کہا کہ سندھ طاس معاہدے کے معاملے پر پاکستان کی پوری سیاسی قیادت یک زبان ہے اور اس حوالے سے ملک کے اندر کسی قسم کا اختلاف موجود نہیں۔
انہوں نے کہا کہ بھارت کو پاکستان کا مؤقف سننا پڑے گا اور وہ پاکستان کی آواز کو دبا نہیں سکتا۔
انہوں نے مزید کہا کہ بین الاقوامی آبی قوانین کے تحت چاہے کوئی ملک دریاؤں کے بالائی حصے (اپر ریپیرین) میں واقع ہو یا زیریں حصے (لوئر ریپیرین) میں دونوں کے حقوق تسلیم شدہ ہیں اور تمام فریقوں کو بین الاقوامی قوانین کی پاسداری کرنا ہوتی ہے۔
عالمی معاہدوں سے انحراف بھارت کی سفارتی تنہائی کا سبب بن رہا ہے
ایمبیسیڈر جوہر سلیم نے کہا کہ بھارت اپنی بین الاقوامی ذمہ داریوں سے فرار حاصل نہیں کر سکتا۔ ان کا کہنا تھا کہ دنیا بھارت کے اقدامات کا مشاہدہ کر رہی ہے اور اسی وجہ سے بھارت سفارتی سطح پر تنہائی کا شکار ہوتا جا رہا ہے۔
انہوں نے کہا کہ آبادی کے اعتبار سے دنیا کا سب سے بڑا ملک ہونے اور دنیا کی چوتھی بڑی معیشت ہونے کے باوجود بھارت کی تزویراتی اہمیت کم ہوتی جا رہی ہے جبکہ پاکستان کو عالمی سطح پر ایک ذمہ دار ریاست، امن کے فروغ کے لیے کردار ادا کرنے والے ملک اور ایک اہم تزویراتی کھلاڑی کے طور پر دیکھا جا رہا ہے۔
ان کا کہنا تھا کہ پاکستان بین الاقوامی قوانین اور معاہدوں کا احترام کرنے والا ملک ہے جبکہ بھارت کو بھی یہی طرز عمل اختیار کرنے کی ضرورت ہے۔ انہوں نے کہا کہ اگر بھارت یہ سمجھتا ہے کہ وہ یکطرفہ طور پر بین الاقوامی معاہدوں کو ختم کر سکتا ہے تو ایسا ممکن نہیں ہوگا اور پاکستان اسے ایسا نہیں کرنے دے گا۔
پاکستان کے پاس قانونی، سفارتی اور دیگر تمام آپشنز موجود ہیں
ایمبیسیڈر جوہر سلیم نے کہا کہ اگر بھارت پاکستان کے حصے کے پانی کو کم کرنے یا روکنے کی کوشش کرتا ہے تو پاکستان کے پاس قانونی، سفارتی اور دیگر تمام آپشنز موجود ہیں۔
مزید پڑھیں: سندھ طاس معاہدہ ناکام ہوا تو دنیا کا کوئی بین الاقوامی معاہدہ محفوظ نہیں رہے گا، مصدق ملک
انہوں نے کہا کہ طاقت کا استعمال پاکستان کی ترجیح نہیں اور یہ صرف آخری آپشن ہو سکتا ہے، تاہم پاکستان پہلے ہی اپنے قانونی حقوق کے تحفظ کے لیے تمام متعلقہ بین الاقوامی فورمز سے رجوع کر چکا ہے۔
انہوں نے کہا کہ چاہے معاملہ بین الاقوامی عدالت انصاف کا ہو یا ثالثی عدالتوں کا، مختلف مواقع پر پاکستان کے مؤقف کو قانونی حمایت حاصل ہوئی ہے۔ اسی طرح سفارتی محاذ پر بھی پاکستان نے دنیا بھر کے دارالحکومتوں اور بین الاقوامی میڈیا میں اپنا مؤقف بھرپور انداز میں پیش کیا ہے۔
ٹریک 2 ڈائیلاگ میں بھی سندھ طاس معاہدے کی اہمیت اجاگر ہوئی
سری لنکا میں حال ہی میں منعقد ہونے والے ٹریک 2 ڈائیلاگ کے حوالے سے گفتگو کرتے ہوئے ایمبیسیڈر جوہر سلیم نے کہا کہ ایسے فورمز میں سابق سفارتکار، سابق اعلیٰ حکومتی عہدیدار اور پالیسی ماہرین شریک ہوتے ہیں جو مختلف مسائل پر تبادلہ خیال کرکے پالیسی ساز اداروں کو تجاویز پیش کرتے ہیں۔
یہ بھی پڑھیے: سندھ طاس معاہدہ صرف پانی کا نہیں، عالمی امن اور سلامتی کا معاملہ بن گیا
انہوں نے کہا کہ انہیں امید ہے کہ ٹریک 2 ڈائیلاگ میں ہونے والی بات چیت سے بھارت کو بھی یہ احساس ہوا ہوگا کہ سندھ طاس معاہدے کے تقدس اور اس کی قانونی حیثیت کو برقرار رکھنا ضروری ہے۔
