بھارت میں سائبر سیکیورٹی کی بڑی ناکامی سامنے آئی ہے، ٹاٹا الیکٹرانکس میں ہونے والے بڑے سائبر حملے اور ڈیٹا لیک کے نتیجے میں ایپل کے آئندہ متوقع آئی فون 18 پرو سے متعلق حساس دستاویزات اور معلومات ڈارک ویب پر سامنے آ گئی ہیں۔
ذرائع کے مطابق رینسم ویئر گروپ نے ٹاٹا الیکٹرانکس سے چوری کیا گیا ڈیٹا ڈارک ویب پر شائع کیا جس میں آئی فون 18 پرو کے پرزہ جات، سپلائرز کی خفیہ فہرستیں اور ڈیوائس کے ماڈلز کی تصاویر شامل ہیں۔ ٹاٹا الیکٹرانکس بھارت میں ایپل کی اہم سپلائر کمپنیوں میں شمار ہوتی ہے۔
ماہرین کے مطابق یہ ڈیٹا لیک ایپل کی عالمی سپلائی چین اور آئی فون کی تیاری سے متعلق انتہائی حساس معلومات کے افشا ہونے کے باعث کمپنی کے لیے تشویش کا باعث بن سکتا ہے۔
یہ بھی پڑھیں: ایپل نے فولڈ ایبل آئی فون کی لانچنگ کیوں مؤخر کی؟
لیک ہونے والی دستاویزات میں کم از کم 6 ایسی فائلیں شامل ہیں جن سے معلوم ہوتا ہے کہ آئی فون 18 پرو کے مختلف پرزے کن کمپنیوں کے ذریعے تیار کیے جا رہے ہیں۔ ایپل عموماً اپنے سپلائرز کے حوالے سے ایسی تفصیلات عوامی سطح پر جاری نہیں کرتا۔
رپورٹس کے مطابق ایپل رواں سال ستمبر میں آئی فون 18 پرو اور آئی فون 18 پرو میکس متعارف کرانے کا ارادہ رکھتا ہے۔
یہ بھی پڑھیں: آئی فون صارفین کیلئے خوشخبری، آئی او ایس 26 کے پوشیدہ فیچرز سامنے آگئے
ٹاٹا الیکٹرانکس نے واقعے کی نوعیت اور نقصانات کا تعین کرنے کے لیے ایک بین الاقوامی کنسلٹنسی فرم کو فرانزک آڈٹ کی ذمہ داری سونپ دی ہے۔ اطلاعات کے مطابق اسی سائبر حملے میں ٹیسلا، کوالکوم اور ٹی ایس ایم سی (TSMC) سے متعلق بعض دستاویزات بھی ڈارک ویب پر شائع کی گئی ہیں۔
