الیکشن کمیشن آزاد جموں و کشمیر نے اس عزم کا اعادہ کیا کہ عام انتخابات کے تمام مراحل آئینی تقاضوں اور مقررہ شیڈول کے مطابق بروقت مکمل کیے جائیں گے۔
چیف الیکشن کمشنر آزاد جموں و کشمیر جسٹس (ر) غلام مصطفٰی مغل کی زیر صدارت عام انتخابات 2026 کی تیاریوں کا جائزہ لینے کے لیے ایک اہم اجلاس منعقد ہوا،
اجلاس میں انتخابی انتظامات اور مختلف مراحل پر ہونے والی پیشرفت کا تفصیلی جائزہ لیا گیا۔
یہ بھی پڑھیں: الیکشن کمیشن آزاد کشمیر کی جانب سے انتخابی شیڈول اور حلقہ بندیوں سے متعلق افواہوں کی سختی سے تردید
اس موقع پر چیف الیکشن کمشنر جسٹس (ر) غلام مصطفٰی مغل نے کہا کہ امیدواروں کو انتخابی نشانات الاٹ کیے جا چکے ہیں۔
جبکہ بیلٹ پیپرز کی طباعت مکمل کر کے انتخابی مواد بھی بروقت متعلقہ مقامات تک پہنچایا جائے گا تاکہ انتخابی عمل میں کسی قسم کی رکاوٹ پیش نہ آئے۔
مزید پڑھیں: آزاد کشمیر انتخابات: استحکام پاکستان پارٹی نے 35 حلقوں میں امیدواروں کو ٹکٹ جاری کردیے
انہوں نے کہا کہ الیکشن کمیشن شب و روز انتخابی تیاریوں میں مصروف ہے اور شفاف، منظم اور غیر جانبدار انتخابات کے انعقاد کو یقینی بنانے کے لیے تمام دستیاب وسائل بروئے کار لائے جا رہے ہیں۔
چیف الیکشن کمشنر نے اس عزم کا بھی اعادہ کیا کہ انتخابی عمل کو مکمل شفافیت، آئینی تقاضوں اور مقررہ انتخابی شیڈول کے مطابق پایۂ تکمیل تک پہنچایا جائے گا تاکہ عوام کا انتخابی نظام پر اعتماد مزید مستحکم ہو۔
