وزیراعظم شہباز شریف نے کروشیا کے وزیر خارجہ و یورپی امور ڈاکٹر گورڈن گرلیچ راڈمین سے ملاقات میں دونوں ممالک کے درمیان تجارت، سرمایہ کاری، آئی ٹی، زراعت، سیاحت، روابط اور ہنرمند افرادی قوت کے شعبوں میں تعاون مزید بڑھانے کی ضرورت پر زور دیا، جبکہ کروشین وزیر خارجہ نے خطے میں امن کے لیے پاکستان کے کردار کو سراہتے ہوئے دوطرفہ تعلقات کو مزید وسعت دینے کے عزم کا اظہار کیا۔
اسلام آباد میں وزیراعظم ہاؤس میں جمہوریہ کروشیا کے وزیر خارجہ و یورپی امور ڈاکٹر گورڈن گرلیچ راڈمین نے وزیراعظم محمد شہباز شریف سے ملاقات کی۔ اس موقع پر نائب وزیراعظم و وزیر خارجہ سینیٹر اسحاق ڈار اور سیکرٹری خارجہ آمنہ بلوچ بھی موجود تھیں۔
یہ بھی پڑھیں:کروشیا کے وزیر خارجہ پہلی بار ایک روزہ دورے پر اسلام آباد پہنچ گئے
وزیراعظم شہباز شریف نے کروشین وزیر خارجہ اور ان کے وفد کا خیرمقدم کرتے ہوئے کہا کہ پاکستان اور کروشیا کے تعلقات باہمی احترام، خیرسگالی اور مشترکہ مفادات پر مبنی ہیں۔ انہوں نے کہا کہ پاکستان دونوں ممالک کے درمیان دوطرفہ تعاون کو مزید فروغ دینے کا خواہاں ہے، خصوصاً تجارت، سرمایہ کاری، انفارمیشن ٹیکنالوجی، رابطہ کاری، زراعت، سیاحت اور ہنرمند افرادی قوت کے شعبوں میں وسیع امکانات موجود ہیں۔
وزیراعظم نے کروشیا کے صدر زوران میلانووچ اور وزیراعظم آندرے پلینکووچ کے لیے نیک تمناؤں کا اظہار کرتے ہوئے دونوں رہنماؤں کو مناسب وقت پر پاکستان کے سرکاری دورے کی دعوت بھی دی۔
ملاقات کے دوران خطے کی مجموعی صورتحال اور باہمی دلچسپی کے امور پر بھی تبادلہ خیال کیا گیا، جبکہ دوطرفہ روابط کو مزید مضبوط بنانے کے مختلف امکانات کا جائزہ لیا گیا۔
Minister for Foreign and European Affairs of the Republic of Croatia, H.E Dr. Gordan Grlić Radman calls on Prime Minister Muhammad Shehbaz Sharif. Islamabad, 9 July 2026. pic.twitter.com/TOFWwlS2s5
— Prime Minister's Office (@PakPMO) July 9, 2026
کروشیا کے وزیر خارجہ ڈاکٹر گورڈن گرلیچ راڈمین نے پرتپاک استقبال پر وزیراعظم کا شکریہ ادا کرتے ہوئے کہا کہ اسلام آباد کا دورہ ان کے لیے اعزاز کی بات ہے۔ انہوں نے پاکستان اور اس کی قیادت کو خطے میں امن کے قیام کے لیے مؤثر کردار ادا کرنے پر مبارکباد دی۔
انہوں نے اس عزم کا اظہار کیا کہ کروشیا کی حکومت پاکستان کے ساتھ تجارت، سرمایہ کاری، اقتصادی تعاون اور دیگر باہمی دلچسپی کے شعبوں میں تعلقات کو مزید وسعت دینے کی خواہاں ہے، تاکہ دونوں ممالک کے درمیان شراکت داری کو نئی جہت دی جا سکے۔
