موسیقی کے بے تاج بادشاہ مائیکل جیکسن کی زندگی پر بننے والی بایوپک ’مائیکل‘ نے عالمی باکس آفس پر ایک ارب ڈالر سے زائد کا بزنس کرکے نئی تاریخ رقم کر دی اور یہ اب تک کی سب سے زیادہ کمائی کرنے والی سوانحی فلم بن گئی ہے۔
ہدایت کار انٹوائن فوکوا کی اس فلم نے 2018 میں ریلیز ہونے والی فلم ’بوہیمین ریپسوڈی‘ اور کرسٹوفر نولان کی ’اوپن ہائیمر‘ کو بھی کمائی کے لحاظ سے پیچھے چھوڑ دیا۔ ’بوہیمین ریپسوڈی‘ نے دنیا بھر میں 911 ملین ڈالر جبکہ ’اوپن ہائیمر‘ نے 977 ملین ڈالر کا بزنس کیا تھا۔
یہ بھی پڑھیں: مائیکل جیکسن کی زندگی پر بننے والی فلم سپر ہِٹ ہوگئی، عالمی باکس آفس پر نیا ریکارڈ قائم
فلم میں مائیکل جیکسن کے بھتیجے جعفر جیکسن نے مرکزی کردار ادا کیا ہے جبکہ کم عمر مائیکل جیکسن کا کردار جولیانو کرو ویلدی نے نبھایا ہے۔ دیگر نمایاں اداکاروں میں کولمین ڈومنگو، نیا لانگ اور جیسیکا سولا شامل ہیں۔
فلم کو ناقدین کی جانب سے ملا جلا ردعمل ملا اور معروف ویب سائٹ روٹن ٹومیٹوز پر اسے ناقدین کی جانب سے 40 فیصد ریٹنگ دی گئی تاہم شائقین نے اسے بھرپور پذیرائی بخشی اور فلم کو 97 فیصد آڈیئنس اسکور حاصل ہوا۔
یہ بھی پڑھیں: ساڑھی پہن کر مائیکل جیکسن کے شاندار ڈانس اسٹیپس، بھارتی خاتون کی ویڈیو سوشل میڈیا پر وائرل
رپورٹس کے مطابق فلم نے ریلیز کے پہلے ہفتے میں دنیا بھر سے 217 ملین ڈالر کی ریکارڈ کمائی کی جو کسی بھی میوزیکل بایوپک کی تاریخ کا سب سے بڑا افتتاحی بزنس ہے۔
فلم میں مائیکل جیکسن کی عالمی شہرت کے ساتھ ساتھ ان کی ابتدائی زندگی، خاندانی پس منظر، کامیابیوں اور پیشہ ورانہ سفر میں پیش آنے والے چیلنجز کو بھی پیش کیا گیا ہے۔
فلم کی شاندار کامیابی کو نہ صرف مائیکل جیکسن کے مداحوں بلکہ فلمی صنعت کے لیے بھی ایک تاریخی سنگ میل قرار دیا جا رہا ہے۔
