وفاقی وزیر اقتصادی امور احد چیمہ کی زیر صدارت ملک میں گندم اور پیٹرولیم مصنوعات کی صورتحال کا جائزہ لینے کے لیے اعلیٰ سطح کا اجلاس منعقد ہوا جس میں گندم کی طلب و رسد، پیٹرولیم مصنوعات کی دستیابی اور ذخیرہ اندوزی کی روک تھام سے متعلق اہم فیصلے کیے گئے۔
یہ بھی پڑھیں: ملک میں ایندھن ذخائر وافر مقدار میں، قلت پیدا کرنے والوں کے خلاف سخت کارروائی کی جائے، وزیراعظم شہباز شریف
اجلاس میں وفاقی وزیر قومی غذائی تحفظ رانا تنویر حسین، سیکریٹری قومی غذائی تحفظ، چیئرمین اوگرا، چاروں صوبوں کے چیف سیکریٹریز اور متعلقہ اداروں کے نمائندوں نے شرکت کی۔
اجلاس کے دوران صوبائی چیف سیکریٹریز نے بریفنگ دیتے ہوئے بتایا کہ اس وقت تمام صوبوں میں گندم کی طلب اور رسد معمول کے مطابق ہے اور کسی قسم کی قلت کا سامنا نہیں۔
وفاقی وزیر احد چیمہ نے اس موقعے پر کہا کہ عوام اور کاشتکاروں کے مفادات کا تحفظ اور ملک بھر میں گندم کی بلا تعطل فراہمی حکومت کی اولین ترجیح ہے۔ انہوں نے یقین دہانی کرائی کہ اگر کسی صوبے کو اضافی گندم کی ضرورت پیش آئی تو اسے پاسکو کے ذخائر سے پورا کیا جائے گا۔
انہوں نے تمام متعلقہ حکام کو گندم کی ذخیرہ اندوزی کے خلاف سخت کارروائی کی ہدایت کرتے ہوئے کہا کہ مصنوعی قلت پیدا کرنے کی کسی کو اجازت نہیں دی جائے گی۔
وفاقی وزیر قومی غذائی تحفظ رانا تنویر حسین نے کہا کہ پاسکو صوبائی حکومتوں کو ہر ممکن تعاون فراہم کرے گا تاکہ گندم کی فراہمی میں کوئی رکاوٹ نہ آئے۔
اجلاس میں ملک میں پیٹرولیم مصنوعات کی دستیابی اور آئل مارکیٹنگ کمپنیوں کی جانب سے ایندھن کی ممکنہ ذخیرہ اندوزی کا بھی تفصیلی جائزہ لیا گیا۔
وفاقی وزیر احد چیمہ اور چیئرمین اوگرا نے تمام چیف سیکرٹریز سے درخواست کی کہ وہ اوگرا کے ساتھ مل کر ذخیرہ اندوز پٹرول پمپس اور آئل مارکیٹنگ کمپنیوں کے خلاف فوری کارروائی کو یقینی بنائیں۔
مزید پڑھیں: کیا ملک بھر میں پیٹرولیم مصنوعات کی قلت کا خدشہ ہے؟
احد چیمہ نے کہا کہ علاقائی صورتحال کا فائدہ اٹھا کر ناجائز منافع خوری یا مصنوعی قلت پیدا کرنے والی پٹرولیم کمپنیوں کے خلاف سخت قانونی کارروائی کی جائے گی۔
انہوں نے واضح کیا کہ ملک میں پیٹرولیم مصنوعات کے وافر ذخائر موجود ہیں اور ایندھن کی کسی قسم کی قلت نہیں لہٰذا کسی بھی کمپنی یا پٹرول پمپ کو ناجائز منافع خوری کے لیے مصنوعی قلت پیدا کرنے کی اجازت نہیں دی جائے گی۔
اجلاس میں چاروں صوبوں کے چیف سیکرٹریز نے یقین دہانی کرائی کہ وہ اوگرا اور دیگر متعلقہ اداروں کے ساتھ مکمل تعاون کرتے ہوئے پیٹرول کی ذخیرہ اندوزی کی روک تھام، بلا تعطل سپلائی اور ناجائز منافع خوری کے خلاف مؤثر اقدامات کریں گے۔
یہ بھی پڑھیے: پیٹرولیم مصنوعات کی قیمتوں میں اضافہ، پیٹرول 13 روپے 18 پیسے، ڈیزل 13 روپے 80 پیسے فی لیٹر مہنگا
وفاقی وزیر احد چیمہ نے اس بات پر بھی زور دیا کہ جائز کاروبار کرنے والوں کو ہرگز ہراساں نہیں کیا جائے گا تاہم ذخیرہ اندوزی اور ناجائز منافع خوری میں ملوث عناصر کے خلاف قانون کے مطابق سخت ترین کارروائی عمل میں لائی جائے گی۔
