آزاد کشمیر میں قانون ساز اسمبلی کے انتخابات کے دوسرے مرحلے کے لیے انتخابی مہم ختم ہوگئی، جبکہ مظفرآباد ڈویژن میں پولنگ کل بروز اتوار ہوگی۔
قانون ساز اسمبلی کے انتخابات کے دوسرے مرحلے کے لیے مظفرآباد ڈویژن کے 3 اضلاع کی 9 نشستوں اور مہاجرین کی 12 نشستوں پر کل، 2 اگست کو پولنگ ہوگی۔
مظفرآباد ڈویژن کے 3 اضلاع کی 9 نشستوں پر رجسٹرڈ ووٹرز کی مجموعی تعداد 8 لاکھ 9 ہزار 621 ہے، جن میں 4 لاکھ 27 ہزار 955 مرد اور 3 لاکھ 81 ہزار 666 خواتین ووٹرز شامل ہیں۔
یہ بھی پڑھیں: آزاد کشمیر انتخابات: کون سے سابق وزرائے اعظم اس معرکے کا حصہ ہیں؟
پولنگ کے لیے مظفرآباد ڈویژن بھر میں ایک ہزار 483 پولنگ اسٹیشن قائم کیے گئے ہیں، جہاں ووٹرز اپنے حقِ رائے دہی کا استعمال کریں گے۔
آزاد کشمیر قانون ساز اسمبلی میں مہاجرین کی 12 نشستوں کے لیے بھی 2 اگست کو پولنگ ہوگی۔ جموں اور ویلی کی 6، 6 نشستوں پر ملک کے مختلف شہروں میں مقیم کشمیری ووٹرز اپنا حقِ رائے دہی استعمال کریں گے۔
جموں کی 6 نشستیں ایل اے 34 جموں ون سے ایل اے 39 جموں سکس تک، جبکہ ویلی کی 6 نشستیں ایل اے 40 ویلی ون سے ایل اے 45 ویلی سکس تک ہیں۔
مزید پڑھیں: آزاد کشمیر: انتخابات 3 مرحلوں میں کرانے کے فیصلے سے سیاسی منظر نامہ تبدیل، کس جماعت کو فائدہ ہوگا؟
چیف الیکشن کمشنر جسٹس (ر) غلام مصطفیٰ مغل نے عوام سے اپیل کی ہے کہ وہ گھروں سے نکل کر اپنا ووٹ ضرور ڈالیں۔
ان کا کہنا تھا کہ اگر عوام ووٹ ڈالنے سے گریز کریں گے تو مسائل جلسوں، جلوسوں اور احتجاج کے ذریعے حل نہیں ہوں گے۔
چیف الیکشن کمشنر نے کہا کہ یہ آزاد کشمیر کی تاریخ کا مشکل ترین انتخاب ہے۔ اگر حالات اسی طرح رہے تو راولاکوٹ میں انتخابات کے شیڈول میں رد و بدل کرنا پڑ سکتا ہے۔
انہوں نے مزید بتایا کہ مظفرآباد کے 2 حلقے، ایل اے 28 لچھراٹ اور ایل اے 31 کھاوڑہ، انتہائی حساس قرار دیے گئے ہیں۔
