ایک نئی تحقیق میں انکشاف ہوا ہے کہ مسلسل بیٹھے رہنے کے دوران مختصر وقفوں سے جسمانی سرگرمی اختیار کرنا کینسر سے موت کے خطرے کو نمایاں حد تک کم کرسکتا ہے۔ برطانیہ کے 91 ہزار 292 افراد پر تقریباً 12 سال تک کی گئی تحقیق کے مطابق روزانہ صرف پانچ منٹ کی بھرپور جسمانی سرگرمی بھی کینسر سے موت کے خطرے میں 22 فیصد کمی سے منسلک پائی گئی، جبکہ بیٹھنے کے ایک گھنٹے کی جگہ ہلکی جسمانی سرگرمی اختیار کرنے سے یہ خطرہ 12 فیصد کم دیکھا گیا۔
یونیورسٹی آف گلاسگو کے محققین کی قیادت میں ہونے والی اس تحقیق میں مسلسل بیٹھنے اور کینسر سے موت کے درمیان تعلق کا جائزہ لیا گیا۔ تحقیق میں شامل افراد نے سات روز تک کلائی پر ایسے آلات پہنے جن کے ذریعے ان کی جسمانی سرگرمی اور بیٹھنے کے معمولات ریکارڈ کیے گئے، جبکہ محققین نے تقریباً 12 سال تک ان کی صحت اور اموات کے نتائج کا جائزہ لیا۔
محققین نے مسلسل بیٹھنے کی ایسی مدت کو طویل عرصے تک بیٹھنا قرار دیا جو کم از کم 30 منٹ جاری رہے اور اس دوران کم از کم 90 فیصد وقت فرد غیر متحرک رہا ہو۔ اس کے برعکس 30 منٹ سے کم بیٹھنے یا بیٹھنے کے دوران مختصر جسمانی سرگرمی کے وقفے کو بیٹھنے میں تعطل قرار دیا گیا۔
یہ بھی پڑھیں:سابق امریکی صدر جو بائیڈن کا کینسر مزید پھیل گیا، بیماری انتہائی تکلیف دہ ہے، بیٹے کا انکشاف
تحقیق کے مطابق روزانہ طویل عرصے تک بیٹھنے میں گزارے جانے والے ہر اضافی گھنٹے کے ساتھ کینسر سے موت کا خطرہ 10 فیصد زیادہ پایا گیا۔ تاہم روزانہ ایک گھنٹے کے بیٹھنے کی جگہ ہلکی جسمانی سرگرمی اختیار کرنے والے افراد میں کینسر سے موت کا خطرہ 12 فیصد کم تھا۔
اسی طرح روزانہ بیٹھنے کے 30 منٹ کی جگہ معتدل جسمانی سرگرمی اختیار کرنے سے کینسر سے موت کے خطرے میں 8 فیصد کمی دیکھی گئی، جبکہ صرف 5 منٹ کی بھرپور جسمانی سرگرمی کے ساتھ یہ خطرہ 22 فیصد کم پایا گیا۔
محققین کے مطابق ہلکی جسمانی سرگرمی میں معمولی رفتار سے چہل قدمی اور گھر کے روزمرہ کام، مثلاً کپڑے استری کرنا یا برتن دھونا بھی شامل ہیں۔
ماہرین کا کہنا ہے کہ تحقیق اس بات کا ثبوت نہیں دیتی کہ مسلسل بیٹھنا براہ راست کینسر کا سبب بنتا ہے، تاہم اس سے یہ ضرور ظاہر ہوتا ہے کہ طویل اور مسلسل غیر متحرک رہنا کینسر سے موت کے زیادہ خطرے سے منسلک ہوسکتا ہے۔
نارتھ ویسٹرن میڈیسن کی چیف بریسٹ امیجنگ ڈاکٹر جارجیا اسپئیر نے کہا کہ تحقیق سے سامنے آنے والی اہم بات یہ ہے کہ صرف بیٹھنے کا مجموعی دورانیہ ہی نہیں بلکہ یہ بھی اہم ہے کہ انسان کس انداز سے بیٹھتا ہے۔ ان کے مطابق بیٹھنے کے دوران باقاعدگی سے حرکت کرنے سے صحت کو قابلِ ذکر فوائد حاصل ہوسکتے ہیں۔
ماہرین نے لوگوں کو مشورہ دیا ہے کہ ہر 30 سے 60 منٹ بعد اٹھ کر کچھ دیر چلیں، کھانے کے بعد مختصر چہل قدمی کریں، لفٹ کے بجائے سیڑھیاں استعمال کریں، فون پر بات کرتے ہوئے چلتے پھرتے رہیں اور دن بھر معمولی جسمانی سرگرمی کے مواقع پیدا کریں۔
یہ بھی پڑھیں:کیموتھراپی کے بعد کینسر کی واپسی کا ایک نیا راز بے نقاب
ماہرین کے مطابق باقاعدہ ورزش، صحت مند وزن برقرار رکھنے، تمباکو نوشی سے گریز، شراب نوشی محدود کرنے اور تجویز کردہ کینسر اسکریننگ کو معمول کا حصہ بنانے کے ساتھ یہ چھوٹی چھوٹی عادات کینسر سمیت کئی دائمی بیماریوں سے لاحق خطرات کم کرنے میں مددگار ہوسکتی ہیں۔
تحقیق کے مصنفین نے تاہم خبردار کیا ہے کہ نتائج کی تشریح احتیاط سے کی جانی چاہیے کیونکہ یہ ایک مشاہداتی مطالعہ ہے اور اس سے براہ راست سبب اور نتیجے کا تعلق ثابت نہیں ہوتا۔ اس کے علاوہ تحقیق میں شامل افراد پوری آبادی کی نمائندگی نہ بھی کرتے ہوں اور ان کی جسمانی سرگرمی صرف سات دن تک ریکارڈ کی گئی، جس میں بیٹھنے کی اصل وجوہات، مثلاً دفتر میں کام، ٹی وی دیکھنا یا گاڑی چلانا، واضح طور پر معلوم نہیں ہوسکیں۔
