الیکشن کمیشن نے پنجاب میں بلدیاتی انتخابات 15 دسمبر 2026 سے 15 جنوری 2027 کے دوران کرانے کی صوبائی حکومت کی تجویز سے اصولی اتفاق کرلیا۔
چیف الیکشن کمشنر سکندر سلطان راجہ کی زیرصدارت پنجاب میں بلدیاتی انتخابات کی تاریخ مقرر کرنے سے متعلق اجلاس ہوا، جس میں الیکشن کمیشن کے ارکان، پنجاب حکومت کی 4 رکنی کابینہ کمیٹی، چیف سیکرٹری پنجاب اور دیگر اعلیٰ حکام نے شرکت کی۔
میڈیا رپورٹ کے مطابق پنجاب حکومت کی جانب سے اجلاس کو بتایا گیا کہ وزیراعلیٰ پنجاب مریم نواز بلدیاتی انتخابات کے انعقاد کے لیے پُرعزم ہیں، تاہم انتخابات کی تیاری اور وسائل کی فراہمی کے لیے وقت درکار ہے۔ صوبائی حکومت نے 15 دسمبر 2026 سے 15 جنوری 2027 کے دوران انتخابات کرانے کی تجویز دی۔
یہ بھی پڑھیں:پنجاب میں بلدیاتی انتخابات: الیکشن کمیشن کی صوبائی حکومت کو مشاورتی کمیٹی تشکیل دینے کی ہدایت
صوبائی حکومت کے مطابق اس عرصے میں طلبہ کے امتحانات مکمل ہوچکے ہوں گے جبکہ دھند کا مسئلہ بھی کم ہوگا۔ انتخابات مرحلہ وار کرانے کی صورت میں سیکیورٹی اور انتظامی امور کو بہتر انداز میں یقینی بنایا جاسکے گا۔
الیکشن کمیشن کو بریفنگ میں بتایا گیا کہ پنجاب میں بلدیاتی حلقہ بندی کا عمل مکمل ہوچکا ہے۔ الیکشن کمیشن نے صوبائی حکومت کی تجویز سے اصولی اتفاق کرتے ہوئے کہا کہ اگر انتخابات مرحلہ وار کرانے ہیں تو صوبائی حکومت اپنا پلان جلد کمیشن کے سامنے پیش کرے۔
چیف الیکشن کمشنر نے کہا کہ آئین کے آرٹیکل 140-A کے تحت بلدیاتی انتخابات کا انعقاد آئینی تقاضا ہے، جبکہ الیکشنز ایکٹ کے تحت بلدیاتی حکومتوں کی مدت ختم ہونے کے 120 دن کے اندر انتخابات کرانا الیکشن کمیشن کی ذمہ داری ہے۔
