وزیراعلیٰ پنجاب مریم نواز شریف نے چین کے صوبے سنکیانگ کے پارٹی سیکریٹری چن شیاوجیانگ سے ملاقات کی ہے، جس میں زراعت، آبپاشی، لائیو اسٹاک اور دیگر شعبوں میں شراکت داری کو فروغ دینے پر اتفاق کیا گیا۔
ملاقات میں کمیونسٹ پارٹی سنکیانگ کے ڈپٹی سیکرٹری ہی ژونگ یو، ہیڈ آف پبلسٹی ڈیپارٹمنٹ وانگ جین زن، ایگزیکٹو وائس گورنر سنکیانگ ژانگ ینگ چن اور صوبائی ڈپٹی سیکریٹری جنرل لی کی یونگ بھی شریک ہوئے۔
یہ بھی پڑھیں: وزیراعلیٰ پنجاب مریم نواز 4 روزہ سرکاری دورے پر چین پہنچ گئیں
صوبہ سنکیانگ کے پارٹی سیکریٹری چن شیاوجیانگ نے وزیراعلیٰ مریم نواز شریف کا پرتپاک خیرمقدم کیا، جس پر وزیراعلیٰ نے ان کا شکریہ ادا کیا۔
ملاقات کے دوران زراعت کے فروغ کے لیے جدید فضائی ٹیکنالوجی، جدید واٹر لیولنگ اور ڈیجیٹل فصل نگرانی کے نظام اختیار کرنے پر اتفاق کیا گیا، جبکہ زرعی آبپاشی، زرعی مشینری اور لائیو اسٹاک کے شعبوں میں تعاون کے امکانات پر تفصیلی تبادلہ خیال کیا گیا۔
وزیراعلیٰ مریم نواز شریف نے چینی حکام کو زرعی مشینری، پانی کے مؤثر استعمال، آبپاشی اور لائیو اسٹاک کے شعبوں میں اشتراک کی پیشکش کی۔ بہتر زرعی پیداوار کے لیے چین کے آزمودہ بیج استعمال کرنے کی ضرورت پر بھی اتفاق کیا گیا۔
مریم نواز شریف نے پنجاب اور چین کے درمیان وفود کے تبادلوں اور عوامی سطح پر تعلقات مزید مضبوط بنانے پر زور دیا۔ ملاقات میں ترقی، علاقائی استحکام اور چین کی بین الاقوامی حکمت عملی کے تحت باہمی تعاون بڑھانے پر بھی گفتگو ہوئی۔
یہ بھی پڑھیں: پاک چین دوستی سمندروں سے گہری، ہمالیہ سے بلند اور اسٹیل سے زیادہ مضبوط ہے، مریم نواز
وزیراعلیٰ پنجاب نے کہا کہ پنجاب زرعی پیداوار کے لحاظ سے پاکستان کا سب سے بڑا صوبہ ہے اور ملک بھر میں گندم، مکئی، گنے اور چاول کی ضروریات پوری کرنے میں اہم کردار ادا کر رہا ہے۔
انہوں نے کہا کہ پنجاب کارپوریٹ زون فارمنگ میں سنکیانگ کے تجربات سے مستفید ہونا چاہتا ہے۔
مریم نواز شریف کا کہنا تھا کہ پنجاب حکومت چین کے ساتھ زراعت، صنعت، معدنیات اور نئی ٹیکنالوجی کے شعبوں میں تعاون کو مزید وسعت دینے کی خواہاں ہے۔
