پاکستانی ہاکی کے عظیم کھلاڑی اور سابق کپتان شہباز احمد سینئر نے ایف آئی ایچ ہاکی ورلڈ کپ 2026 کی اختتامی تقریب میں ایک بار پھر عالمی سطح پر ملک کا نام روشن کردیا۔
انٹرنیشنل ہاکی فیڈریشن (FIH) کی جانب سے ورلڈ کپ 2026 کی اختتامی تقریب میں پاکستانی ہاکی لیجنڈ شہباز احمد سینئر کو پلیئر آف دی ٹورنامنٹ کا ایوارڈ پیش کرنے کے لیے خصوصی طور پر مدعو کیا گیا۔ شہباز احمد سینئر نے یہ اعزاز ارجنٹائن کے فارورڈ تھامس ڈومینے کو پیش کیا جنہیں ٹورنامنٹ کا بہترین کھلاڑی قرار دیا گیا۔ ڈومینے نے ایونٹ میں 10 گول کے ساتھ ٹاپ اسکورر کا اعزاز بھی حاصل کیا۔
A Proud Moment for Pakistan on the International Stage
Pakistani hockey legend Shahbaz Ahmad Senior, often called the "Maradona of Hockey" and the captain of the 1994 World Cup-winning team, was honoured by the FIH to present the Best Player Award to Argentina's star at the FIH… pic.twitter.com/ySpdQ1l6og— Abdul Majeed Khan Marwat (@koolkopper) August 31, 2026
’ہاکی کے میراڈونا‘ کے نام سے شہرت رکھنے والے شہباز احمد سینئر کی عالمی ہاکی میں شرکت پاکستان کے اس سنہری دور کی یاد تازہ کرتی ہے جب گرین شرٹس کا شمار دنیا کی مضبوط ترین ہاکی ٹیموں میں ہوتا تھا۔
شہباز احمد سینئر 1994 میں سڈنی میں ہونے والے ہاکی ورلڈ کپ میں پاکستان کی فاتح ٹیم کے کپتان تھے۔ پاکستان نے فائنل میں نیدرلینڈز کو پنالٹی شوٹ آؤٹ میں شکست دے کر عالمی اعزاز اپنے نام کیا تھا۔
یہ بھی پڑھیں: ہاکی نیشنز کپ 2026: پاکستان انڈر 21 کی بیلاروس کو 1-4 سے شکست، ٹورنامنٹ میں پہلی شاندار فتح
ان کا انفرادی ریکارڈ بھی عالمی ہاکی میں غیر معمولی اہمیت رکھتا ہے۔ شہباز احمد سینئر ہاکی کی تاریخ کے واحد کھلاڑی ہیں جنہوں نے مسلسل دو ورلڈ کپ، 1990 اور 1994، میں پلیئر آف دی ٹورنامنٹ کا اعزاز حاصل کیا۔ ایف آئی ایچ کے ریکارڈ کے مطابق انہوں نے پاکستان کی جانب سے 304 بین الاقوامی میچز کھیلے، جو طویل عرصے تک قومی ٹیم کے لیے سب سے زیادہ میچز کھیلنے کا ریکارڈ رہا۔
شہباز احمد سینئر نے 1990 کے لاہور ورلڈ کپ میں بھی شاندار کارکردگی کا مظاہرہ کرتے ہوئے پلیئر آف دی ٹورنامنٹ کا ایوارڈ حاصل کیا تھا۔ 1994 میں سڈنی ورلڈ کپ میں بھی وہ اسی اعزاز کے حقدار قرار پائے، یوں وہ مسلسل دو ورلڈ کپ میں یہ اعزاز حاصل کرنے والے ہاکی کی تاریخ کے واحد کھلاڑی بن گئے۔
یہ بھی پڑھیں: ہاکی ورلڈ کپ کلاسیفیکیشن میچ: نیوزی لینڈ نے پاکستان کو 2-4 سے شکست دے دی
پاکستانی ہاکی لیجنڈ نے اپنے کیریئر کے دوران تین اولمپک گیمز میں بھی پاکستان کی نمائندگی کی اور 1992 کے بارسلونا اولمپکس میں قومی ٹیم کے ساتھ کانسی کا تمغہ جیتا۔ ان کی برق رفتاری، گیند پر غیر معمولی کنٹرول، ڈرِبلنگ اور حریف دفاع کو چیرنے کی صلاحیت نے انہیں دنیا کے بہترین ہاکی فارورڈز میں شامل کیا۔
ایف آئی ایچ ورلڈ کپ 2026 میں شہباز احمد سینئر کی بطور ہاکی لیجنڈ شرکت اس لحاظ سے بھی اہم رہی کہ عالمی ہاکی کے سب سے بڑے ایونٹ کی اختتامی تقریب میں پاکستان کی تاریخ کے ایک عظیم کھلاڑی نے عالمی سطح کے نئے اسٹار کو سب سے بڑا انفرادی اعزاز پیش کیا۔
یہ بھی پڑھیں: پاکستان ہاکی لیگ 2027 کی پہلی سہ ماہی میں کرانے کا اعلان
یہ منظر پاکستان کے شاندار ہاکی ماضی اور عالمی کھیلوں میں ملک کے تاریخی مقام کی عکاسی کرتا ہے، جہاں شہباز احمد سینئر جیسی شخصیات آج بھی پاکستانی ہاکی کی پہچان اور ورثے کی نمائندگی کر رہی ہیں۔
واضح رہے کہ 2026 کا ورلڈ کپ جرمنی نے اسپین کو 1-0 سے شکست دے کر جیت لیا جبکہ ارجنٹائن نے نیدرلینڈز کو 2-1 سے ہرا کر کانسی کا تمغہ حاصل کیا۔ ارجنٹائن کے تھامس ڈومینے ٹورنامنٹ کے بہترین کھلاڑی قرار پائے۔
یہ بھی پڑھیں: پاکستان ہاکی ٹیم ورلڈ کپ میں شرکت کے لیے نیدرلینڈز روانہ
شہباز احمد سینئر کی موجودگی نے ورلڈ کپ کی اختتامی تقریب کو پاکستان کے لیے ایک یادگار لمحے میں تبدیل کردیا اور یہ پیغام دیا کہ پاکستانی ہاکی کے عظیم کھلاڑیوں کا عالمی کھیل میں مقام آج بھی نمایاں ہے۔
