بین الاقوامی مارکیٹ میں قیمتیں گرنے کے اثرات کے باعث ملکی صرافہ مارکیٹ میں منگل کے روز بھی سونے کی قیمتوں میں کمی کا سلسلہ جاری رہا۔
یہ بھی پڑھیں: نیدرلینڈز نے امریکا اور کینیڈا سے کتنا سونا برطانیہ منتقل کیا؟ جان کر ہوش اُڑ جائیں گے
آل پاکستان جیمز اینڈ جیولرز صرافہ ایسوسی ایشن کے جاری کردہ اعداد و شمار کے مطابق، کاروباری دن کے دوران فی تولہ سونے کی قیمت میں 1,800 روپے کی کمی ریکارڈ کی گئی جس کے بعد 24 کیرٹ فی تولہ سونا 4,55,736 روپے کی سطح پر آ گیا۔
اسی طرح 10 گرام سونے کی قیمت میں 1,543 روپے کی کمی ہوئی جس کے بعد اس کی نئی قیمت 3,90,720 روپے مقرر کی گئی۔
کمی کا تسلسل
اس سے قبل پیر کے روز بھی فی تولہ سونے کی قیمت میں 2,700 روپے کی بڑی کمی دیکھی گئی تھی جس کے بعد سونا 4,57,536 روپے پر بند ہوا تھا۔
مزید پڑھیے: سونا، چاندی، آتش فشانی راکھ اور خفیہ اجزا سے بنی ٹی شرٹ: پہننے کا سب سے بڑا فائدہ کیا ہے؟
عالمی مارکیٹ میں فی اونس سونے کی قیمت 18 ڈالر کی کمی کے بعد 4,332 ڈالر پر آ گئی جس کے نتیجے میں مقامی مارکیٹ میں بھی قیمتیں مزید نیچے آئیں۔
چاندی کی قیمت میں کمی
سونے کے ساتھ ساتھ چاندی کی قیمت میں بھی کمی ریکارڈ کی گئی جہاں فی تولہ چاندی 62 روپے سستی ہو کر 7,038 روپے کی سطح پر آ گئی۔
