وفاقی وزیر داخلہ راناثنااللہ نے کہا ہے کہ آئندہ عام انتخابات فروری یا مارچ تک جا سکتے ہیں کیوں کہ نئی مردم شماری کے بعد حلقہ بندیاں ہونا آئین کا تقاضا ہے۔
نجی ٹی وی کے پروگرام میں اظہار خیال کرتے ہوئے انہوں نے کہا کہ میری پارٹی کا مفاد کچھ بھی ہو ہمیشہ ملکی مفاد کو ترجیح دینی چاہیے۔
مزید پڑھیں
راناثنااللہ نے کہا کہ نگران وزیراعظم کا نام ابھی تک فائنل نہیں ہوا، اگر ماہر معیشت کی طرف بات گئی تو حفیظ شیخ ایک معتبر نام ہو سکتا ہے۔
انہوں نے کہا کہ ہو سکتا ہے کہ کل تک نگراں وزیراعظم کا نام فائنل ہو جائے، ایسا نام بھی آ سکتا ہے جس پر ابھی تک بات ہی نہیں ہوئی۔
راناثنااللہ نے کہا کہ مردم شماری کو اتفاق رائے سے قبول کیا گیا جو خوش آئند ہے، اس سے قبل مشترکہ مفادات کونسل کا اجلاس اس لیے نہیں بلایا جا رہا تھا کیوں کہ نئی مردم شماری پر بلوچستان، کراچی اور خیبرپختونخوا کو اعتراضات تھے۔ اگر مردم شماری پر اعتراضات برقرار رہتے تو یہ ملک کے لیے بہتر نہیں تھا۔
انہوں نے کہا کہ چیئرمین پی ٹی آئی عمران خان نے گرفتاری کے دوران کوئی مزاحمت نہیں کی۔ وکیل زدوکوب اور مزاحمت کا کہہ رہے ہیں جو درست نہیں۔
عمران خان جیل میں بہتر کلاس کے لیے جیل سپرنٹنڈنٹ کو درخواست دیں
انہوں نے کہا کہ جیل میں بہتر کلاس حاصل کرنے کے لیے عمران خان کو جیل سپرنٹنڈنٹ کو درخواست دینا ہو گی۔
رانا ثنااللہ نے کہا کہ عمران خان کے دور میں ہمیں تو جیل میں بہتر کلاس نہیں دی گئی لیکن ہم ان کے ساتھ کوئی غیرقانونی سلوک نہیں کریں گے۔
