شہر قائد میں دن دہاڑے شہریوں سے اسلحے کے زور پر لوٹ مار کے واقعات میں مسلسل اضافہ ہورہا ہے۔
پرانی سبزی منڈی کے علاقے میں صارم برنی ٹرسٹ کے سامنے ڈاکوؤں کی کار میں بیٹھے خاندان سے لوٹ مار کی سی سی ٹی وی فوٹیج منظر عام پر آئی ہے۔
ویڈیو میں دیکھا جا سکتا ہے کہ دو موٹر سائیکلوں پر سوار چار ڈاکو سڑک کے قریب واقع پارکنگ ایریا میں کھڑی ایک گاڑی کے قریب آکر رکتے ہیں۔ ان میں سے دو اپنی اپنی موٹر سائیکل پر سوار رہتے ہیں۔
ایک ڈاکو موٹر سائیکل سے اتر کر اسلحے کے زور پر کارمیں بیٹھے خاندان سے لوٹ مار کرتا ہے جبکہ دوسرا ڈاکو اپنے ساتھی کو کسی بھی صورتحال سے خبردار کرنے کے لیے گاڑی کے پیچھے کھڑا رہتا ہے۔
فوٹیج میں دیکھا جا سکتا ہے کہ سڑک پر ٹریفک رواں دواں ہے اور ڈاکو اطمینان سے لوٹ مار کر رہے ہیں۔
ڈاکو واردات کے بعد مصروف شاہراہ یونیورسٹی روڈ سے با آسانی فرار ہو جاتے ہیں۔
