سابق وزیراعلیٰ گلگت بلتستان خالد خورشید کی نااہلی کے باعث خالی ہونے والی نشست پر ہونے والے ضمنی انتخابات میں تحریک انصاف کے امیدوار نے کامیابی حاصل کر لی ہے۔
گلگت بلتستان کے حلقہ ایل اے 13 استور ایک میں ہونے والے ضمنی انتخابات کے غیر حتمی غیر سرکاری نتائج کے مطابق پی ٹی آئی کے امیدوار خورشید خان 6 ہزار 219 ووٹ لے کر کامیاب ہو گئے ہیں۔
مزید پڑھیں
ضمنی الیکشن میں پاکستان مسلم لیگ ن کے امیدوار رانا فرمان علی نے 5 ہزار 225 ووٹ حاصل کیے ہیں اور وہ دوسرے نمبر پر رہے، جبکہ پیپلزپارٹی کے امیدوار عبدالحمید نے 3 ہزار 909 ووٹ حاصل کیے اور تیسرے نمبر پر رہے۔
واضح رہے کہ ضمنی انتخابات میں کامیابی حاصل کرنے والے خورشید خان سابق وزیراعلیٰ خالد خورشید کے والد ہیں۔
سابق وزیراعلیٰ گلگت بلتستان خالد خورشید جولائی 2023 میں جعلی ڈگری کیس میں نااہل ہو گئے تھے جس کے بعد یہ سیٹ خالی ہو گئی تھی۔
یہ بھی یاد رہے کہ گلگت بلتستان کا ایوان مجموعی طور پر 33 ارکان پر مشتمل ہے، 24 سیٹوں پر براہِ راست الیکشن ہوتے ہیں، اس کے علاوہ خواتین کی 6 مخصوص نشستیں ہیں، جبکہ 3 نشستیں ٹیکنو کریٹس کی ہیں۔
2020 کے عام انتخابات میں پاکستان تحریک انصاف نے کامیابی حاصل کی تھی جس کے بعد عمران خان نے خالد خورشید کو وزیراعلیٰ کے لیے امیدوار نامزد کیا تھا اور وہ اکثریت سے قائد ایوان منتخب ہو گئے تھے۔
