اقوام متحدہ کے سیکرٹری جنرل انتونیو گوتریس نے مقبوضہ فلسطینی علاقوں میں غیر قانونی اسرائیلی بستیوں کو ختم کرنے کا مطالبہ کر دیا۔ ان کا کہنا تھا فلسطینی علاقوں میں اسرائیلی بستیوں کا کوئی جواز نہیں۔ مغربی کنارے میں کشیدگی کے بعد مقبوضہ بیت المقدس کی حیثیت کو یکطرفہ اقدامات سے تبدیل نہیں کیا جا سکتا ہے۔
سعودی خبر رساں ادارے کے مطابق انہوں نے فلسطینی عوام کے ناقابل تنسیخ حقوق سے متعلق اقوام متحدہ کی کمیٹی کو بتایا کہ ہر نئی آباد کاری امن کی راہ میں اضافی رکاوٹ بن رہی ہے۔
سیکرٹری جنرل انتونیو گوتریس نے کہا ہر نئی بستی کی سرگرمی بین الاقوامی قانون کے تحت غیر قانونی ہے اور اسے روکنا چاہیے۔ تشدد کے لیے اکسانا ختم ہونا چاہیے۔ کوئی ایسی چیز جو دہشت گردی کو جواز بناتی ہو ان سب کو مسترد کر دینا چاہیے۔
ان کا کہنا تھا کہ مقبوضہ فلسطینی علاقوں کی موجودہ صورتحال برسوں میں سب سے زیادہ کشیدہ ہے۔ اسرائیل۔فلسطین امن عمل تعطل کا شکار ہے اور تناؤ عروج کو پہنچ رہا ہے۔
سیکرٹری جنرل نے زور دیا کہ ہماری فوری ترجیح مزید کشیدگی کو روکنا، تشدد میں کمی لانا اور امن بحالی ہونا چاہیے ۔
