عروہ حسین اور فرحان سعید جو اپنی غیر معمولی اداکاری کی وجہ سے مشہور ہیں اور لاکھوں لوگ ان کو پسند کرتے ہیں، انہوں نے نہ صرف ایک مشہور جوڑے کے طور پر دلوں کو موہ لیا ہے بلکہ شادی شدہ زندگی کے ایک نئے باب کا آغاز بھی کر دیا ہے۔ دونوں کے ہاں بیٹی کی پیدائش پر ان کے مداحوں نے بھی خوشی کا اظہار کیا ہے۔
عروہ حسین نے بچی کی پیدائش کی خبر سوشل میڈیا پر شیئر کی، اور بچی کا نام ’جہاں آرا‘ بھی اپنے مداحوں کو بتایا۔ انہوں نے بیٹی کی آمد پر خوشی اور تشکر کا اظہار کرتے ہوئے لکھا کہ جہاں آرا ہمارے دلوں کی ملکہ ہے۔ انہوں نے اپنی زندگی میں ناقابل تصور خوشی لانے کے لیے جہاں آرا کا شکریہ بھی ادا کیا۔
مزید پڑھیں
عروہ اور فرحان کی طرف سے شیئر کی جانے والی تصاویر سے ظاہر ہوتا ہے کہ دونوں میاں بیوی خوش ہیں، اور مداحوں نے بھی اپنے تبصروں میں دل کو چھونے والے پیغامات، دعاؤں اور نیک تمناؤں کا اظہار کیا ہے۔
View this post on Instagram
عروہ حسین نے انسٹاگرام پر پوسٹ شیئر کرتے ہوئے لکھا کہ فَبِأَيِّ آلَاءِ رَبِّكُمَا تُكَذِّبَانِ: پھر تم اپنے اللہ کی کون کون سی نعمت کو جھٹلاؤ گے۔
’خوشی، نعمت اور ہماری زندگی کا سب سے قیمتی تحفہ آ گیا ہے، ’جہاں آرا سعید‘، ہماری آنکھوں کا تارا جسے ہم پیار سے “آرا” کہیں گے، آپ ہمیشہ کے لیے ہمارے دلوں کی ملکہ ہیں، ہمارے لیے ناقابل تصور خوشی اور شکر گزاری لانے کے لیے آرا کا شکریہ، آپ کی پیدائش کے ساتھ ہی یہ ہمارا دوبارہ جنم بھی ہے، ہم امید کرتے ہیں کہ آپ سے سیکھیں گے اور آپ کے لیے ہر روز بہتر اور بہتر والدین بنیں گے، آپ ترقی کریں، کھلیں، اپنے پاکیزہ دل کے ساتھ ہر جگہ کو روشن کریں۔ ہماری دنیا میں خوش آمدید ’الحمدللہ‘۔
واضح رہے کہ عروہ حسین اور فرحان سعید نے دسمبر 2016 میں شادی کی تھی جبکہ سال 2020 میں اس جوڑی کے درمیان علیحدگی کی خبریں بھی سامنے آئی تھیں، جن کی بعد میں تردید کر دی گئی تھی۔
