وزارت صحت نے کہا ہے کہ کورونا جے این ون وییرینٹ کے ابھی تک مجموعی طور پر 15 کیسز رپورٹ ہوئے ہیں۔ این آئی ایچ لیب نے 8، آغا خان یونیورسٹی نے 5 اور ڈاؤ ہیلتھ یونیورسٹی کراچی نے 2 کیسز رپورٹ کیے ہیں۔
ترجمان وزارت صحت کے مطابق وزیر صحت ڈاکٹر ندیم جان نے کہا ہے کہ وزارت صحت کرونا کے نئے وییرینٹ کی خصوصی طور پر نگرانی کر رہی ہے۔ نئے ویرینٹ سے عوام کو محفوظ رکھنے کے لیے تمام تر ضروری اقدامات کو یقینی بنا رہی ہے اور وفاق صوبوں کے ساتھ مکمل رابطے میں ہے۔
مزید پڑھیں
ڈاکٹر ندیم جان کا کہنا تھا کہ یہ ویرینٹ ابھی تک دنیا میں 60 سے زائد ممالک میں رپورٹ ہوا ہے اور ڈبلیو ایچ او کے مطابق اس ویرینٹ کے پھیلاؤ کا رسک بہت کم ہے۔ قومی ادارہ صحت نے موسمی معمول کے تحت کالی کھانسی کی روک تھام اور کنٹرول کے لیے ایک ایڈوائزری جاری کی ہے کیوںکہ سردیوں کے مہینوں میں کالی کھانسی کے پھیلاؤ کا رسک معمولی طور پر بڑھ جاتا ہے۔
ڈاکٹر ندیم جان نے مزید بتایا کہ پاکستان میں اس مرض کے بڑے پیمانے پر پھیلنے کا امکان کم ہے جبکہ ایڈوائزری کا مقصد صحت کے اداروں کو احتیاطی اور کنٹرول کے اقدامات کے بارے میں آگاہ کرنا ہے۔ حفظان صحت کے سادہ طریقے بھی اس کے پھیلاؤ کو روکنے میں کلیدی کردار ادا کرتے ہیں۔
