امریکی محکمہ خارجہ کے ترجمان میتھیو ملر نے کہا ہے کہ امریکا نے افغان طالبان پر واضح کردیا ہے، وہ افغانستان میں دہشتگردوں کو محفوظ جگہ نہ دیں، امریکا پرعزم ہے کہ افغانستان کبھی دوبارہ دہشتگردی کے لیے لانچنگ پیڈ نہیں بن سکے گا۔
امریکی محکمہ خارجہ کے ترجمان میتھیو ملر نے واشنگٹن میں پریس کانفرنس کرتے ہوئے کہا کہ طالبان عالمی برادری کے ساتھ انسداد دہشتگردی کے اپنے تمام وعدوں کو پورا کریں، امریکا اس حوالے سے پرعزم ہے کہ افغانستان کبھی دوبارہ دہشتگردی کے لیے لانچنگ پیڈ نہیں بن سکے گا۔‘
انہوں نے کہا کہ امریکا نے افغان طالبان پر واضح کیا ہے کہ وہ دہشتگردوں کو محفوظ پناہ گاہیں نہ دیں۔ یہ ان کی ذمہ داری ہے۔
مزید پڑھیں
میتھیو ملر سے سوال کیا گیا کہ امریکا افغانستان میں دہشتگردوں کے خلاف کیا کارروائی کررہا ہے؟ جواب میں انہوں نے کہا کہ ہم ابھرتے خطرات کے خلاف تیار رہتے ہیں، داعش سمیت دہشتگرد گروہوں کو فروری 2022 میں صدر کے حکم پر افغانستان میں نشانہ بنایا، داعش رہنما حاجی عبداللہ پر کابل میں کامیاب فضائی حملہ کیا گیا۔
’ کابل میں کارروائی کے دوران القاعدہ کا امیر بھی مارا گیا، ظواہری بھی امریکی فضائی حملے میں مارا گیا۔ انہوں نے کہا کہ امریکا و دیگر مغربی ممالک کے خلاف دہشتگردانہ حملے روکنے کے لیے کام جاری رکھیں گے۔‘
امریکی فوج نے حوثی باغیوں کے 4 ڈرونز تباہ کردیے
دوسری طرف محکمہ دفاع کے مطابق امریکی افواج نے یمنی حوثیوں کی جانب سے داغے گئے 4 ڈرونز کو تباہ کردیا ہے، ڈرونز کا ہدف بحیرہ احمر میں اتحادی بحری جہاز اور ایک امریکی جنگی جہاز تھا۔
امریکی فوج کا کہنا ہے کہ حوثیوں کے ڈرونز خطے میں تجارتی جہازوں اور امریکی بحریہ کے لیے خطرہ ہیں۔
