الیکشن کمیشن نے سینٹ کی 48 خالی نشستوں پر انتخابات کے انعقاد کے لیے الیکشن پروگرام کا نوٹیفکیشن 14 مارچ 2024 کو جاری کیا جس کے مطابق سینیٹ کی 29 جنرل، 8 خواتین، 9 ٹیکنو کریٹ، علما اور 2 غیر مسلم کی نشستوں پر انتخاب مورخہ 2 اپریل 2024 کو ہونا ہے۔
مزید پڑھیں
الیکشن کمیشن آف پاکستان کے ترجمان کی طرف سے جاری بیان کے مطابق انتخابات کے لیے کل 147 امیدواروں نے کاغذات نامزدگی جمع کروائے، ریٹرننگ افسران نے امیدواروں کی حتمی لسٹ جاری کر دی ہے جس کے مطابق 18 امیدواران بلامقابلہ منتخب ہوئے ہیں، جس میں پنجاب کی 7 جنرل نشستوں، اسی طرح بلوچستان کی 7 جنرل نشستوں، 2 خواتین اور 2 ٹیکنو کریٹ، علما کی نشستیں شامل ہیں۔
اب مورخہ 2 اپریل 2024 کو سینیٹ کی 30 نشستوں پر انتخاب ہو گا جس کی تفصیل جاری کر دی گئی ہے۔
الیکشن کمیشن کی جانب سے جاری تفصیل کے مطابق فیڈرل کیپیٹل ایک جنرل، ایک ٹیکنو کریٹ، پنجاب کی 2 خواتین، 2 ٹیکنوں کریٹ، علما ایک غیر مسلم، سندھ کی 7 جنرل، 2 خواتین، 2 ٹیکنو کریٹ، علما، ایک غیر مسلم، ،خیبر پختونخوا کی 7 جنرل، 2 خواتین اور 2 ٹیکنو کریٹ کی نشستیں شامل ہیں اور ان پر 59 امیدواران مد مقابل ہیں۔
الیکشن کمیشن نے سینیٹ انتخابات کے انعقاد کے تمام انتظامات مکمل کر لیے ہیں، بیلٹ پیپرز کی طباعت اور ریٹرنگ افسران کو الیکشن میٹریل کی ترسیل کا کام بھی مکمل ہو گیا ہے۔
