سانگھڑ: ضعیف العمر پولیس اہلکار کو ڈیوٹی میں رعایت مل گئی

ایس ایس پی سانگھڑ اعجاز احمد شیخ نے سنجھورو تھانے پر مامور ضعیف العمر پولیس اہلکار کی دوران ڈیوٹی ویڈیو سوشل میڈیا پر وائرل ہونے کے بعد انہیں ڈیوٹی میں رعایت دیدی۔

ایس ایس پی نے ویڈیو سوشل میڈیا پر وائرل ہونے کے بعد معاملے کا نوٹس لیتے ہوئے پولیس اہلکار محمد عیسیٰ کو اپنے دفتر طلب کیا تھا۔

ملاقات کے دوران پولیس اہلکار محمد عیسیٰ نے بتایا کہ ان کو کوئی بیماری نہیں، تاہم بڑی عمر کی وجہ سے کمزوری ہے۔

ایس ایس پی کی جانب سے پولیس اہلکار کو ریٹائرمنٹ کا آپشن دیا گیا مگر انہوں نے 60 سال عمر پوری ہونے تک نوکری کی خواہش کا اظہار کیا۔

ایس ایس پی نے معمر پولیس اہلکار کی خواہش پر ڈیوٹی تبدیل کرتے ہوئے ہدایات جاری کیں کہ آئندہ ان سے ہلکی پھلکی ڈیوٹی لی جائے۔