بالی ووڈ اداکارہ کترینہ کیف نے سوشل میڈیا پر ہونے والی ٹرولنگ اور اپنی جسمانی ساخت سے متعلق نامناسب تبصروں پر ردعمل دیتے ہوئے کہا ہے کہ انسان کو دوسروں کی رائے اپنی خود اعتمادی اور زندگی کے فیصلوں پر حاوی نہیں ہونے دینی چاہیے۔
اداکارہ کا یہ بیان ایسے وقت میں سامنے آیا ہے جب گزشتہ ماہ ایک عوامی تقریب میں شرکت کے بعد انہیں اپنے جسمانی خدوخال خصوصاً زچگی کے بعد جسم میں آنے والی تبدیلیوں پر سوشل میڈیا صارفین کی جانب سے تنقید کا سامنا کرنا پڑا تھا۔
Oh my baby she indirectly replied to the troll she faced 😢 but with grace and confidence#Katrinakaif 🫶🌟 pic.twitter.com/pJik0umhJ3
— Miri Miri (@KatrinauniqueD) October 8, 2026
بھارتی میڈیا رپورٹس کے مطابق کترینہ کیف نے جمعرات کو لندن میں اپنے بیوٹی برانڈ ’کے بائے کترینہ‘ (Kay By Katrina) کی پہلی سالگرہ کے سلسلے میں منعقدہ تقریب میں شرکت کی۔ تقریب کا اہتمام معروف بیوٹی ریٹیلر ’اسپیس این کے‘ (Space NK) کے اشتراک سے کیا گیا تھا جہاں اداکارہ نے اپنی شخصیت سے مخلص رہنے اور تنقید کا سامنا کرنے کے حوالے سے خیالات کا اظہار کیا۔
کترینہ کیف نے کہا کہ سوشل میڈیا پر بننے والے بیانیے کو انسان کی خود اعتمادی متاثر کرنے کی اجازت نہیں دینی چاہیے۔ ان کے مطابق اگر کوئی شخص ہر وقت دوسروں کی توقعات پر پورا اترنے کی کوشش کرے تو اس کی اپنے لیے فیصلے کرنے کی صلاحیت متاثر ہو سکتی ہے۔
یہ بھی پڑھیں: ماں بننے کے بعد کترینہ کیف کی خوبصورتی اور صحت سے متعلق سوچ بدل گئی
اداکارہ کا کہنا تھا کہ اگر وہ ہر تنقید اور تبصرے کے مطابق اپنے اقدامات تبدیل کرنے لگیں تو خوف ان پر حاوی ہو جائے گا اور وہ زندگی میں آگے بڑھنے کے قابل نہیں رہیں گی۔
انہوں نے مزید کہا کہ زندگی میں کبھی ایسا وقت آتا ہے جب دنیا آپ کی تعریف کرتی ہے لیکن بعض اوقات آپ کو خود اپنا سب سے بڑا حامی بننا پڑتا ہے۔
کترینہ کیف نے اپنی اس سوچ کو اپنے بیوٹی برانڈ کے نعرے ’اٹس کے ٹو بی یو‘ (It’s Kay to Be You) سے بھی جوڑا، جس کا بنیادی پیغام خود کو قبول کرنا اور اپنی اصل شخصیت کے ساتھ مخلص رہنا ہے۔
یہ بھی پڑھیں: ’میں نے غلطی کی‘رنبیر کپور سے تعلق ختم ہونے پر کترینہ کیف کا ردعمل
اداکارہ کے مطابق زندگی کے مختلف مراحل میں انسان کی کیفیت اور حالات بدلتے رہتے ہیں۔ کبھی ایسا محسوس ہوتا ہے کہ ہر کام بہترین انداز میں ہو رہا ہے، جبکہ کبھی کئی معاملات توقعات کے مطابق نہیں چلتے۔ اسی طرح بعض اوقات انسان خود کو اپنی بہترین حالت میں محسوس کرتا ہے اور کبھی اس مقام تک پہنچنے کے سفر سے گزر رہا ہوتا ہے۔ کترینہ نے کہا کہ زندگی کے ہر مرحلے کو قبول کرنا اور خود کو حد سے زیادہ سنجیدہ نہ لینا ضروری ہے۔
واضح رہے کہ کترینہ کیف نے گزشتہ ماہ امبانی خاندان کی رہائش گاہ پر منعقدہ گنیش پوجا میں شرکت کی تھی جس کے بعد ان کی تصاویر سوشل میڈیا پر سامنے آئیں۔ اس موقع پر بعض صارفین نے ان کی جسمانی ساخت سے متعلق نامناسب تبصرے کیے جبکہ متعدد افراد نے اداکارہ کا دفاع بھی کیا۔
یہ بھی پڑھیں: وِکی کوشل اپنی عمر سے زیادہ سمجھ دار ہیں، کترینہ کیف
رپورٹس کے مطابق کترینہ کیف نے نومبر 2025 میں اپنے بیٹے وِہان کو جنم دیا تھا تاہم تنقید کرنے والوں نے زچگی کے بعد جسم میں آنے والی قدرتی تبدیلیوں کو بھی تنقید کا نشانہ بنایا۔
اداکارہ کی حمایت میں شوبز انڈسٹری کی متعدد شخصیات بھی سامنے آئیں جن میں سلمان خان، ہریتھک روشن، سمیرہ ریڈی اور ساؤنڈریا رجنی کانتھ شامل ہیں۔ ان شخصیات سمیت سوشل میڈیا صارفین نے کترینہ کے حق میں آواز اٹھائی اور جسمانی ساخت کی بنیاد پر کسی کو تنقید کا نشانہ بنانے کی مخالفت کی۔
