لاہور ہائیکورٹ نے تعلیمی اداروں میں طالبات کو مبینہ طور پر ہراساں کرنے کے واقعات پر تحقیقات کے لیے دائر درخواست کی سماعت کرتے ہوئے آئی جی پنجاب اور ایڈووکیٹ جنرل پنجاب کو طلب کرلیا ہے۔
چیف جسٹس لاہور ہائیکورٹ جسٹس عالیہ نیلم نے شہری شکیل بٹ کی رانا سکندر ایڈوکیٹ کی وساطت سے دائر درخواست پر سماعت کرتے ہوئے آئی جی پنجاب، ایڈووکیٹ جنرل پنجاب اور لاہور کالج فار ویمن یونیورسٹی کی رجسٹرار کو کل طلب کرلیا۔
یہ بھی پڑھیں: لاہور ہائیکورٹ نے جنسی زیادتی کے مقدمات میں سیمپل کی حفاظت پر رپورٹ طلب کرلی
دوران سماعت چیف جسٹس عالیہ نیلم نے نجی کالج کی طالبہ سے متعلق من گھڑت واقعہ اور سوشل میڈیا پر وائرل ویڈیو کے حوالے سے ریمارکس دیتے ہوئے کہا کہ اینٹی ریپ ایکٹ تو متاثرہ بچی کا نام پبلش کرنے کی اجازت نہیں دیتا، کیا آئی جی پنجاب اتنے بےخبر تھے کہ انہوں نے تصاویر اور ویڈیو وائرل ہونی دیں۔
چیف جسٹس نے ریمارکس دیے کہ اس بچی کے ساتھ واقعہ ہوا یا نہیں لیکن بچی کی زندگی کو تباہ کردیا گیا۔ چیف جسٹس نے حکم جاری کیا کہ کل تمام افسران ریکارڈ سمیت عدالت میں پیش ہوں۔
یہ بھی پڑھیں: پاکستانی تعلیمی اداروں میں جنسی زیادتی و ہراسانی کے واقعات کیوں بڑھ رہے ہیں؟
سماعت کے دوران درخواستگزار کے وکیل نے کہا اسپیکر پنجاب اسمبلی نے کہا تھا کہ وائس چانسلر لاہور کالج فار ویمن یونیورسٹی میرے پاس آئیں تو وہ رونے لگی، اسپیکر کے مطابق وائس چانسلر نے کہا کہ یونیورسٹی میں خواتین کو ہراساں کیا جارہا ہے۔
وکیل درخواست گزار نے عدالت کو بتایا کہ ایک نجی چینل کی ویب سائٹ پر اسپیکر کا بیان شائع ہوا ہے، پنجاب یونیورسٹی میں ایک طالبہ خودکشی کرلیتی ہے، نجی کالج میں طالبہ سے مبینہ زیادتی کی خبر پر لوگوں کی املاک کو نقصان پہنچایا گیا۔
یہ بھی پڑھیں: طالبہ سے مبینہ جنسی زیادتی: لاہور سمیت دیگر شہروں میں احتجاج، پنجاب اسمبلی میں بھی ہنگامہ
چیف جسٹس عالیہ نیلم نے ریمارکس دیے کہ آئی جی پنجاب بتائیں سوشل میڈیا پر وائرل ہونے والی ویڈیو کو کیوں روکا نہیں گیا، اس بچی کی زندگی کو تو تباہ کردیا گیا ہے۔ بعدازاں، عدالت نے آئی جی پنجاب، ایڈووکیٹ جنرل پنجاب اور دیگر کو طلب کرتے ہوئے درخواست کی سماعت کل تک ملتوی کردی۔
