سنا ہے بانی پی ٹی آئی کرپشن سے بچنے کے لیے ڈیل کرنا چاہتے ہیں، عطااللہ تارڑ

جمعرات 16 جنوری 2025
icon-facebook icon-twitter icon-whatsapp

وزیر اطلاعات و نشریات عطا الللہ تارڑ نے کہا ہے کہ 190 ملین پاؤنڈز میگا کریشن کا اسکینڈل ہے، پاکستان تحریک انصاف کو چیلنج ہے کہ وہ بتائے برطانیہ نے 190 ملین پاؤنڈز حکومت پاکستان کو کیوں واپس کیے، بانی پی ٹی آئی کا ذرائع آمدنی کیا ہے، کابینہ میں بند لفافہ کیوں لے آئے، اب سنا ہے بانی پی ٹی آئی کرپشن اسکینڈل سے بچنے اور جیل سے باہر آنے کے لیے ڈیل کرنا چاہتے ہیں۔

یہ بھی پڑھیں:190 ملین پاؤنڈز ریفرنس: عمران خان اور بشریٰ بی بی سوالنامے کا جواب جمع نہیں کراسکے

جمعرات کو پریس کانفرنس سے خطاب کرتے ہوئے وفاقی وزیر اطلاعات و نشریات عطا اللہ تارڑ نے کہا کہ یہ پہلی دفعہ ہے کہ غیر جانبدار مبصرین بھی 190 ملین پاؤنڈز کے میگا کرپشن اسکینڈل میں اور کسی کو ذمہ دار قرار نہیں دے رہے ہیں۔

انہوں نے کہا کہ یہ ایک ایسا تاریخی اسکینڈل ہے کہ پاکستان کی تاریخ میں اس پیمانے پر کسی بھی فرد واحد کی جانب سے اتنی کرپشن سامنے نہیں آئی ہے،جس کے بارے میں کہا گیا کہ کابینہ میں بھی لفافہ نہ کھولا جائے۔

انہوں نے کہا کہ جب سے ہماری حکومت آئی ہے بہت سارے عالمی اداروں نے ہماری ریٹنگز بڑھا دی ہیں، پی آئی اے کی یورپ کے لیے سروس بحال ہو گئی ہے، ورلڈ اکنامک فورم کی رپورٹ سامنے آئی ہے جس میں ہماری معیشت کے لیے مثبت اشاریے دیے گئے ہیں۔

مزید پڑھیں:190 ملین پاؤنڈ ریفرنس: بشریٰ بی بی کے ناقابل ضمانت وارنٹ گرفتاری جاری

عطا اللہ تارڑ نے کہا کہ ہماری حکومت شرح سود کو 22 سے 13 فیصد تک پہنچا دیا، مہنگائی کی شرح 38 سے 20 فیصد تک پہنچ گئی ہے۔  ڈیفالٹ کا خطرہ ختم ہو گیا ہے، باہر سے سرمایہ کاری آ رہی ہے۔

انہوں نے کہا کہ بانی پی ٹی آئی نے شہباز شریف پرکرپشن ثابت کرنے کے لیے پوری کوشش کی وہ کسی طرح سے برطانیہ کی کسی ایجنسی سے ان کے خلاف کوئی فیصلہ لے لیں لیکن وہ ناکام رہے۔

عطا اللہ تارڑ نے کہا کہ برطانیہ کی کرائم ایجنسی نے پوری تحقیق کے بعد کہا کہ شہباز شریف کے خلاف ایک روپے کی کوئی کرپشن سامنے نہیں آئی ہے۔

عطا اللہ تارڑ نے کہا کہ اسی ایجنسی نے باہر سے 190 ملین پاؤنڈز ریکور کر کے پاکستان بھیجے، اس حوالے سے پوری تحقیق کی گئی، اگر یہ پیسہ وہاں پر ضبط شدہ نہیں تھا تو اتنی بڑی رقم حکومت پاکستان کو واپس کیوں کرتے؟۔

یہ بھی پڑھیں:190 ملین پاؤنڈز سپریم کورٹ کے اکاؤنٹ میں جمع نہیں ہوئے، یہ سراسر جھوٹ ہے، خواجہ آصف

انہوں نے کہا کہ پورے وثوق اور یقین کے ساتھ پاکستان تحریک انصاف کی پوری لیگل ٹیم بشمول سلمان اکرم راجا اور علی ظفر کو چیلنج کرتا ہوں کہ وہ اسی بات پر وضاحت دے دیں کہ اگر یہ 190 ملین پاؤنڈز کرپشن کے نہیں تھے اور وہاں برطانیہ میں ضبط شدہ نہیں تھے وہ واپس حکومت پاکستان کے حوالے کیوں کیے گئے۔

عطا اللہ تارڑ نے کہا کہ 190 ملین پاؤنڈز پاکستان کے ٹیکسسز کا تھا وہ پاکستان عوام کا تھا اور انہیں ہی ملنا تھا، یہ پیسہ پاکستان میں صحت تعلیم، انفراسٹرکچر پر لگایا جانا تھا۔

انہوں نے کہا کہ پی ٹی آئی کے بڑے سے بڑے وکیل کو چینلج کرتا ہوں کہ ہو آئیں اور بتائیں کہ یہ پیسہ برطانیہ نے واپس پاکستان کو کیوں دیا اگر یہ ضبط شدہ نہیں تھا؟۔

مزید پڑھیں:جج کے رویے سے لگ رہا ہے عمران خان کو 190 ملین پاؤنڈز کیس میں سزا سنا دی جائے گی، علیمہ خان

جب یہ پیسہ پاکستان آیا تو پی ٹی آئی کی کرپشن کا سلسلہ شروع ہو گیا، ملی بھگت اور چالاکی سے کرپشن کی سٹوری شروع کر دی گئی، بانی پی ٹی آئی ان کی اہلیہ اور فرح گوگی نے مل کر اس پیسے کو القادرٹرسٹ کے نام سے ہڑپ کیا۔

ان کا کہنا تھا کہ پی ٹی آئی والے بتائیں کہ عمران خان کا لاہور زمان پارک میں 25 کروڑ کا گھر کیسے بنا وہ پیسہ کہاں سے آیا جب کہ عمران خان دعویٰ کرتے ہیں کہ ان کا کوئی ذریعہ آمدنی نہیں ہے۔

عطا اللہ تاڑر نے کہا کہ لاہور زمان پارک میں گھر بنتا ہے، یہ پیسہ اسی پراپرٹی ٹائیکون سے آیا، یہ اسی 190 ملین پاؤنڈز سے بنایا گیا پیسہ تھا جو ایک پراپرٹی ٹائیکون سے کے ذریعے حاصل کیا گیا۔

یہ بھی پڑھیں: 190 ملین پاؤنڈ ریفرنس کیا ہے اور اس کا بحریہ ٹاؤن سے کیا تعلق ہے؟

بعد ازاں انہوں نے کسی ’ماڑے‘ وکیل سے مدد لی، القادر ٹرسٹ کا مشورہ دیا گیا، ذلفی بخاری ٹرسٹی تھے، پھر میاں بیوی بن اس کے ٹرسٹی بن گئے۔ پراپرٹی ٹائیکون کو 80 سے 90 ارب روپے کا فائدہ دیا گیا، پوری پی ٹی آئی کو چیلنج کرتا ہوں اسے غلط ثابت کر کے دکھائیں، غیر جانبدار مبصر کہتے ہیں القادر ٹرسٹ کرپشن کا میگا اسکینڈل ہے۔

انہوں نے ایک سوال کے جوا ب میں کہا کہ میگا کرپشن اسکینڈل پر کوئی بات چیت نہیں ہو سکتی، کوئی قتل کر دے اور پھر کہے معاف کر دیں یہ نہیں ہو سکتا ، باقی مذاکرات جاری ہیں ہم چاہتے ہیں وہ خوش اسلوبی کے ساتھ آگے بڑھیں۔

انہوں نے کہا کہ کرپشن پر کوئی ڈیل نہیں ہو سکتی، سنا ہے بانی پی ٹی آئی کرپشن اسکینڈل سے باہر نکلنے کے لیے ڈیل کرنا چاہتے ہیں، وہ اوپر سے دباؤ بڑھانے چاہتے ہیں اور اندر سے کہہ رہے ہیں کہ کوئی مجھے یہاں جیل سے باہر نکلوائے۔

آپ اور آپ کے پیاروں کی روزمرہ زندگی کو متاثر کرسکنے والے واقعات کی اپ ڈیٹس کے لیے واٹس ایپ پر وی نیوز کا ’آفیشل گروپ‘ یا ’آفیشل چینل‘ جوائن کریں

icon-facebook icon-twitter icon-whatsapp