وزیر دفاع خواجہ آصف نے کہا ہے کہ بھارتی جارحیت کے جواب میں ہم نے بھرپور جوابی کارروائی کرتے ہوئے برتری حاصل کرلی ہے۔
میڈیا سے گفتگو کرتے ہوئے انہوں نے بتایا کہ پاک فضائیہ نے دشمن کے 5 جہاز مار گرائے ہیں جبکہ بریگیڈ ہیڈکوارٹر بھی تباہ کردیا گیا ہے۔
واضح رہے کہ بھارت نے مظرآباد، کوٹلی اور بہاولپور سمیت دیگر علاقوں میں میزائل داغے ہیں، جس کے نتیجے میں معصوم بچی سمیت 8 معصوم شہری شہید ہوگئے۔
پاک فوج کے ترجمان لیفٹیننٹ جنرل احمد شریف چوہدری نے کہا ہے کہ بھارت کی جانب سے شرمناک حملہ کیا گیا ہے جس کا بھرپور جواب دیا جارہا ہے۔ بھارتی حملوں میں 8 پاکستانی شہید جبکہ 33 زخمی ہوگئے۔
راولپنڈی میں پریس کانفرنس کرتے ہوئے انہوں نے کہاکہ بھارت نے 6 مقامات پر 24 حملے کیے، احمد پور شرقیہ میں معصوم بچی سمیت 5 پاکستانی شہید ہوگئے۔
انہوں نے کہاکہ بھارت نے مظفرآباد میں مسجد کو نشانہ بنایا، جس کے نتیجے میں ایک بچی زخمی ہوئی اور مسجد کو نقصان پہنچا، جبکہ کوٹلی میں مسجد عباس کو نشانہ بنایا گیا، اس کے علاوہ مریدکے میں بھی مسجد پر میزائل داغے گئے جس میں ایک شہری شہید اور ایک زخمی ہوگیا۔
لیفٹیننٹ جنرل احمد شریف نے کہاکہ بھارتی فوج نے سیالکوٹ کے علاقے کوٹلی لوہاراں میں ایک میزائل داغا، جبکہ شکر گڑھ میں ایک ڈسپنسری کو نقصان پہنچایا گیا ہے۔
