جمعیت علما اسلام (جے یو آئی) کے سربراہ مولانا فضل الرحمان نے کہا ہے کہ پاکستان ہمیشہ بنگلہ دیش کی خوشحالی، ترقی، استحکام اور فلاح کا خواہاں ہے۔ پاکستان بنگلہ دیش کو بھائی کی طرح دیکھتا ہے اور ماضی کی تلخ یادیں بھول چکا ہے۔
یہ بات انہوں نے بنگلہ دیش چین میتری کانفرنس سینٹر کے ہارمونی ہال میں جمعیت علما اسلام بنگلہ دیش کے اراکین کے اجتماع میں مہمان خصوصی کے طور پر خطاب کرتے ہوئے کہی۔
مزید پڑھیں: آپ پیدل ہماری طرف آئیں گے تو ہم دوڑ کر آپکی طرف آئیں گے، مولانا فضل الرحمان کا ڈھاکہ میں خطاب
اجلاس کی صدارت جمعیت علما اسلام بنگلہ دیش کے صدر مولانا عبیداللہ فاروق نے کی جبکہ مرکزی سیکریٹری مولانا منجور الاسلام نے انتظامی نگرانی کی۔ خیرمقدم کے کلمات سینیئر نائب صدر مولانا عبدالرّب یوسفی نے پیش کیے۔
خطاب میں جمعیت علما اسلام پاکستان کے سیکریٹری مولانا عبدالغفور حیدری اور جمعیت علما نیپال کے نائب صدر مولانا شفیق الرحمان قاسمی بھی شریک ہوئے۔
مولانا فضل الرحمان نے کہاکہ اسلام امن اور سلامتی کا دین ہے، لیکن دنیا بھر میں امریکا فساد پھیلا رہا ہے۔ مسلمانوں کے اندر اختلافات دشمنوں کے حملوں کا موقع فراہم کررہے ہیں۔
انہوں نے کہاکہ جمعیت علما اسلام پاکستان ہمیشہ فرقہ اور مسلک سے بالاتر ہو کر مسلم و غیر مسلم سب کے حقوق کے تحفظ کے لیے سرگرم رہی ہے۔
اس موقع پر بی این پی، اے بی پارٹی، اسلامی تحریک بنگلہ دیش، این سی پی، لیبر پارٹی، جاگپار، عوامی پارٹی، خلافت تحریک، بنگلہ دیش خلافت مجلس اور نظام اسلام پارٹی کے نمایاں سیاسی و سماجی رہنما بھی موجود تھے۔
مزید پڑھیں: کیا 25 ہزار میں آئمہ کرام کا ضمیر خریدنا چاہتے ہو؟ فضل الرحمان کی پنجاب حکومت پر پھر تنقید
مولانا فضل الرحمان نے مزید کہاکہ پاکستان اور بنگلہ دیش کے درمیان خیرسگالی کے جذبات دونوں ممالک کی ترقی اور خوشحالی کا ذریعہ بنیں گے۔ امت مسلمہ کی روحانی دنیا تقسیم نہیں ہو سکتی اور دنیا کی کوئی طاقت ان تعلقات کو توڑ نہیں سکتی۔
