صدر مملکت آصف علی زرداری نے کویت کے قومی دن اور ہالہ فروری کی تقریبات کے پرمسرت موقع پر امیرِ کویت شیخ مشعل الاحمد الجابر الصباح اور کویت کے عوام کو دلی مبارکباد پیش کی اور ان کے لیے نیک تمناوں کا اظہار کیا۔
مزید پڑھیں: سرحد پار دہشتگردی ناقابل برداشت، پاکستانیوں کا تحفظ ہر قیمت پر یقینی بنایا جائے گا، صدر زرداری
ایوان صدر کے پریس ونگ کے مطابق صدر مملکت نے کہا کہ یہ تقریبات امیرِ کویت کی دانشمندانہ قیادت میں کویتی قوم کی استقامت، اتحاد اور مسلسل ترقی کی عکاس ہیں۔ انہوں نے اپنے خط میں پاکستان اور کویت کے درمیان تاریخی تعلقات کو اجاگر کرتے ہوئے کہا کہ یہ روابط باہمی اعتماد، مشترکہ اقدار اور علاقائی امن و خوشحالی کے مشترکہ عزم پر قائم ہیں۔
صدر زرداری نے کہا کہ دونوں ممالک کے درمیان برادرانہ تعلقات تجارت، سرمایہ کاری، انفارمیشن ٹیکنالوجی، دفاعی تعاون اور عوامی سطح پر روابط سمیت مختلف اہم شعبوں میں مسلسل فروغ پا رہے ہیں۔ انہوں نے کویت میں مقیم متحرک پاکستانی برادری کو دونوں ممالک کے درمیان ایک اہم پل قرار دیا جو کویت کی ترقی میں مثبت کردار ادا کرنے کے ساتھ تعلقات کو مزید مضبوط بنا رہی ہے۔
مزید پڑھیں: صدر آصف زرداری اور وزیراعظم شہباز شریف کی اہل پاکستان کو رمضان المبارک کے آغاز پر مبارکباد
صدر مملکت نے عزم ظاہر کیا کہ پاکستان کویت کی ترقی اور خوشحالی کے سفر میں دوطرفہ تعاون کو مزید فروغ دے گا۔ انہوں نے امیرِ کویت کی صحت و تندرستی، کویتی عوام کی خوشحالی اور پاکستان و کویت کے درمیان برادرانہ تعلقات کی پائیدار مضبوطی کے لیے نیک تمناؤں کا بھی اظہار کیا۔
