اطالوی وزیر داخلہ نے اعلان کیا ہے کہ لیگل مائیگریشن کو فروغ دینے کے لیے پاکستان کی اسکلڈ لیبر فورس کے لیے10 ہزار 500 ورک ویزے جاری کیے جائیں گے۔
وفاقی وزیر داخلہ محسن نقوی کی اٹلی کے ہم منصب میٹیو پینٹے ڈوسی سے ملاقات کی، جس میں دوطرفہ امور پر تبادلہ خیال کیا گیا۔
مزید پڑھیں: جعلی دستاویزات پر کوئٹہ سے اٹلی جانے والے 2 مسافر جہاز سے اتارلیے گئے
اطالوی وزیر داخلہ نے کہاکہ پاکستانی ڈپلومیٹک پاسپورٹ رکھنے والوں کو اٹلی کے ویزا سے استثنیٰ ہوگا۔
انہوں نے محسن نقوی کو مخاطب کرتے ہوئے کہاکہ آپ نے کچھ عرصہ قبل ہونے والی ملاقات میں ڈپلومیٹک پاسپورٹ پر ویزے سے استثنیٰ کی بات کی تھی۔
وفاقی وزیر داخلہ محسن نقوی نے غیرقانونی امیگریشن کی روک تھام کے لیے حکومت پاکستان کے مؤثر اقدامات سے آگاہ کیا۔
اطالوی وزیر داخلہ نے غیر قانونی امیگریشن کی روک تھام کے لیے پاکستانی وزارت داخلہ کی مؤثر پالیسی کی تعریف کی۔
انہوں نے کہاکہ غیر قانونی امیگریشن، انسانی اسمگلنگ اور منشیات کی روک تھام کے لیے پاکستانی اداروں کی کامیابیاں قابل تحسین ہیں۔
ملاقات میں پنجاب پولیس کے افسران نے پولیس خدمت مراکز گلوبل کی افادیت بارے بریف کیا، جسے بہت زیادہ سراہا گیا۔
مزید پڑھیں: اٹلی کا مکمل فنڈڈ اسکالرشپس کا اعلان، پاکستانی طلبا کیسے فائدہ اٹھا سکتے ہیں؟
اٹلی میں پاکستان کے سفیر علی جاوید، ڈی جی ایف آئی اے ڈاکٹر عثمان انور، ایم ڈی پنجاب سیف سٹی اتھارٹی احسن یونس، سینیئر پولیس آفیسرز عابد خان اور سہیل چوہدری بھی اس موقع پر موجود تھے۔
