سعودی حکام کی جانب سے حرمین شریفین میں آنے والے زائرین اور عبادت گزاروں کو سہولت فراہم کرنے کے لیے 24 گھنٹے خدمات مہیا کرنے کا اعلان کیا گیا ہے۔
جنرل اتھارٹی برائے نگہداشت امورِ مسجد الحرام و مسجد نبوی کے مطابق مسجد الحرام اور مسجد نبوی میں دو مرکزی گیسٹ کیئر مراکز اور 19 ذیلی مراکز کے ذریعے یہ خدمات فراہم کی جا رہی ہیں۔ ان مراکز کو ایک مربوط نظام کے تحت چلایا جا رہا ہے تاکہ عبادت گزاروں کی ضروریات پوری کی جا سکیں اور انہیں محفوظ اور سہل ماحول میسر آئے۔
یہ بھی پڑھیے: سعودی عرب کے جازان ریجن میں آم کی فصل تیار، 65 ہزار ٹن فصل متوقع
ان مراکز میں بزرگوں اور معذور افراد کے لیے خصوصی خدمات فراہم کی جا رہی ہیں، جبکہ گمشدہ بچوں کو سنبھالنے اور ان کے اہلِ خانہ سے دوبارہ ملانے کے لیے بھی انتظامات کیے گئے ہیں۔ اس کے علاوہ زائرین کے سامان کو محفوظ رکھنے کے لیے لگیج اسٹوریج کی سہولت بھی فراہم کی گئی ہے تاکہ حرمین شریفین کے اندر آمد و رفت کو آسان بنایا جا سکے۔
حکام کے مطابق زائرین کی سہولت کے لیے جدید رابطہ ذرائع بھی فراہم کیے گئے ہیں تاکہ وہ آسانی اور تیزی سے مطلوبہ خدمات تک رسائی حاصل کر سکیں۔ مزید برآں، ان مراکز کے مقامات معلوم کرنے کے لیے کیو آر کوڈز بھی متعارف کرائے گئے ہیں، جن کے ذریعے زائرین آسانی سے ان مراکز تک پہنچ سکتے ہیں۔
