اٹلی کی قومی فٹبال ٹیم کی مسلسل تیسری بار ورلڈ کپ کے لیے کوالیفائی نہ کرنے کی ناکامی کے بعد اٹالین فٹبال فیڈریشن کے سربراہ گبریئل گراوینا مستعفی ہوگئے۔
غیر ملکی خبر رساں ادارے کے مطابق گبریئل گراوینا نے روم میں فیڈریشن ہیڈکوارٹر میں ہونے والے اجلاس کے بعد اپنے عہدے سے استعفیٰ دینے کا اعلان کیا۔ ان کا یہ فیصلہ اس وقت سامنے آیا جب اٹلی کے وزیر کھیل اینڈریا ابودی نے ایک روز قبل ان سے مستعفی ہونے کا مطالبہ کیا تھا۔
یہ بھی پڑھیے: اٹلی مسلسل تیسری بار فیفا ورلڈ کپ سے باہر، بوسنیا کے ہاتھوں پنالٹیز پر شکست
4 مرتبہ کی عالمی چیمپئن اٹلی کی ٹیم پلے آف مرحلے میں بوسنیا کے خلاف پنالٹی شوٹ آؤٹ میں شکست کے بعد ورلڈ کپ 2026 کے لیے کوالیفائی نہ کرسکی۔ یہ مسلسل تیسری بار ہے کہ اٹلی ورلڈ کپ سے باہر ہوگیا ہے، جسے ملک کی فٹبال تاریخ کا بڑا دھچکا قرار دیا جا رہا ہے۔
دوسری جانب قومی ٹیم کے ہیڈ کوچ جینارو گیٹوسو کے بھی مستعفی ہونے کا امکان ظاہر کیا جا رہا ہے، جبکہ سابق معروف گول کیپر اور ٹیم کے جنرل منیجر جیان لُوئیجی بوفون پہلے ہی اپنے عہدے سے استعفیٰ دے چکے ہیں۔
یہ بھی پڑھیے: فیفا ورلڈ کپ 2026: میچز پاکستانی وقت کے مطابق کب دیکھے جاسکیں گے؟
یورپی فٹبال تنظیم کے صدر الیکساندر چیفرین نے بھی اٹلی کے اسٹیڈیمز کی خراب صورتحال پر تشویش کا اظہار کرتے ہوئے خبردار کیا ہے کہ اگر انفراسٹرکچر بہتر نہ کیا گیا تو 2032 کی یورپی چیمپئن شپ کی میزبانی اٹلی سے واپس لی جا سکتی ہے۔
واضح رہے کہ گبریئل گراوینا 2018 میں فیڈریشن کے صدر منتخب ہوئے تھے، تاہم حالیہ ناکامیوں اور ٹیم کی گرتی کارکردگی کے باعث انہیں عہدہ چھوڑنا پڑا۔
