پاکستانی ڈرامہ انڈسٹری کی معروف اداکارہ رمشا خان نے شادی کے بعد اپنے کیریئر سے عارضی وقفہ لینے کا فیصلہ کر لیا ہے۔ ذرائع کے مطابق اداکارہ نے حال ہی میں اپنے ساتھی اداکار خوشحال خان کے ساتھ ایک نجی تقریب میں نکاح کیا جس کی تصاویر سوشل میڈیا پر لیک ہونے کے بعد یہ خبر منظرِ عام پر آئی۔
اطلاعات کے مطابق دونوں فنکار اپنی شادی کو نجی رکھنا چاہتے تھے تاہم تصاویر کے غیر متوقع طور پر سامنے آنے کے بعد مداحوں کو اس پیش رفت کا علم ہوا۔ اس صورتحال کے بعد رمشا خان نے سوشل میڈیا پیجز سے اپنی تصاویر ہٹانے کی درخواست کی اور اپنے انسٹاگرام اکاؤنٹ سے تمام پوسٹس بھی حذف کر دیں جس پر مداحوں کی جانب سے حیرت کا اظہار کیا گیا۔
اداکارہ کی سابق منیجر ثمرہ نے تصدیق کی ہے کہ رمشا خان کچھ عرصے کے لیے نئے پراجیکٹس سائن نہیں کریں گی۔ ان کے مطابق اداکارہ گزشتہ سال دسمبر سے اس فیصلے پر غور کر رہی تھیں اور اب وہ اپنی ذاتی زندگی پر توجہ مرکوز کرنا چاہتی ہیں۔
رمشا خان کے اس فیصلے پر سوشل میڈیا صارفین کی جانب سے ملا جلا ردِعمل سامنے آیا ہے۔ بعض صارفین نے ان کے فیصلے کو سراہتے ہوئے نیک تمناؤں کا اظہار کیا، جبکہ کچھ نے اسے تنقید کا نشانہ بھی بنایا۔ تاہم مجموعی طور پر اسے اداکارہ کا ذاتی فیصلہ قرار دیا جا رہا ہے۔
